E chatoescht Chrëschtdagsiessen (A2)

Afleveringen

Fuesent zu Lëtzebuerg (A2)
19 feb· Poterkëscht vum INLL
Wëllkomm zréck an der Poterkëscht!
Haut schwätze mir iwwer d'Fueszäit zu Lëtzebuerg.
Vill Spaass beim Nolauschteren!
-
Transkript:
A: Schued! Geschwënn ass d’Fuesent scho rëm riwwer!
B: Waars de op engem Fuesbal?
A: Ech war souguer op zwee Fuesbaler an op zwou Kavalkaden!
B: Wow! Du hues vill Energie! Als wat waars de da verkleet?
A: Ech war eng Kéier als Prinzessin an eng Kéier als Maus verkleet, a fir op d’Kavalkaden hunn ech en Äisbierekostüm ugedoen, well et esou kal war.
B: Witzeg!
A: Waars de och op engem Fuesbal?
B: Nee, dat ass net esou menges... Ech hunn d’Fuesmusek iwwerhaapt net gär.
A: Mee Kavalkade sinn awer flott! Do ass ëmmer eng gutt Stëmmung. D’nächst Kéier gees de mat eis!
B: Nee, ech verkleede mech net gär. Als Kand hat ech et gär, mee elo seet dat mir näischt méi.
A: A ok! Häss de da Loscht den nächste Mëttwoch op Réimech ze fueren? Da gëtt de Stréimännche verbrannt! Ech war d’lescht Joer do. Dat ass och flott! An do ass keng Fuesmusek!
B: Wat ass dat?
A: Zu Réimech gëtt traditionell op Äschermëttwoch de Stréimännche verbrannt, fir der Fuesent an dem Wanter äddi ze soen.
B: Oho! Dat kléngt extra! Kanns de mer dat méi genee erklären?
A: De Stréimännchen, eng Figur aus Stréi, gëtt an engem Danz-Cortège duerch d’Stroosse vu Réimech bis op d’Muselbréck gedroen. Op der Bréck gëtt de Männche mat Feier ugefaang an an d’Waasser geheit. An de Schaltjoren gëtt eng Stréifräche verbrannt.
B: E Fräsch?
A: Nee, eng Frächen. Dat ass eng vereelzt an ëmgangssproochlech Diminutivform vu “Fra”. Dat seet een elo net méi, mee dann erkenns de d’nächst Kéier d’Wuert, wann s de et héiers oder lies.
B: Ok! Wat mécht een do nach?
A: Si zerwéiere gebakene Fësch a Gromperekichelcher, an et kritt ee Glüwäin ze drénken.
B: Hm. Wéini ass dann Äschermëttwoch?
A: Dëst Joer fält en op de 5. Mäerz.
B: Waart, ech kucken a mäin Agenda...Nee, do kann ech net, ech hunn deen Dag zwou wichteg Reuniounen. Ech ka mer net fräi huelen.
A: Schued! Vläicht hues de d’nächst Joer Zäit.
B: Jo! Gëtt et net nach e Fest, wou mir dem Wanter äddi soen? Déi Traditioun kënnt mir bekannt vir.
A: Genee! D’Buergbrennen!
B: A jo! Dat hunn ech schonn héieren. Ass dat iwwerall oder just an deenen Uertschaften, wou eng Buerg steet?
A: Nee, dat ass a ville Gemengen uechter d’Land. Lokal Veräiner këmmere sech ëm d’Organisatioun. Si bauen d’Buerg an zerwéieren och Iessen a Gedrénks. D’Buerg besteet aus Holz, aus alen Äscht, aus Stréi, aus den ale Chrëschtbeemercher, asw. D’Form vun der Buerg ka variéieren. Oft ass se a Form vun engem Kräiz.
B: Mee firwat ass d’Buerg dann net a Form vun enger Buerg? Firwat heescht et da Buerg?
A: Jo, dat ass e bësse witzeg. “Buerg” kënnt vu Latäin “burere”, dat heescht “brennen”.
B: Wéi? Dann heescht “Buergbrennen” eigentlech “Brennenbrennen”?
A: Jo!
B: Wat kann een dann do iessen an drénken?
A: Oft gëtt et Ierzebulli, dat ass eng Zopp aus Ierbessen, et gëtt Grill- a Mettwurschten, Bouneschlupp, eng Zopp mat Bounen, Glüwäin an anert Gedrénks.
B: Wéini ass dat? Och op Äschermëttwoch?
A: Nee, e puer Deeg duerno. Buergbrennen ass ëmmer den éischte Sonndeg oder och Samschdeg no der Fuesent. Dëst Joer ass et den 8. an 9. Mäerz.
B: Dat ass gutt! Ech hunn de Weekend besser Zäit. Duer kann ech matkommen!
A: Super! Da kënns de bei eis! Dat gëtt flott!
B: Ech freeë mech drop! Ech wëll onbedéngt all d’Lëtzebuerger Traditioune kenne léieren!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Op eng Hochzäit goen (B1)
13 feb· Poterkëscht vum INLL
Wëllkomm zréck an der Poterkëscht!
-
Transkript
Aluedung op eng Hochzäit
A: O, kuck emol! Ech sinn op eng Hochzäit invitéiert ginn!
B: Ou?! Vu wiem dann?
A: Vum Marie a vum Bruno.
B: Da lies emol vir, wat op der Invitatioun steet !
A: Ok, ee Moment … Léift Lucie, du bass heimat häerzlech invitéiert, dee schéinsten Dag vun eisem Liewe mat eis ze feieren.
B: Wéi romantesch!
A: De 15. Juni um 15 Auer bestuede mir eis an der Kierch zu Réimech.
B: O, op der Musel! Wéi flott!
A: Jo. Ech liese weider: Duerno feire mir mat Iech am Restaurant Wäistuff. Fir Iessen, Gedrénks a gutt Musek ass gesuergt.
B: O, an der Wäistuff war ech schonn op enger Kommioun! Dat ass e gudde Restaurant, an et gëtt bestëmmt och gudde Wäin.
A: Ech si scho gespaant. Zum Schluss steet nach: So eis wgl. bis den 1. Mee Bescheed, ob s du kënns, an ob s du eng aner Persoun matbréngs. Mir freeën eis drop!
B: O, kann ech matkommen?
A: Haha, nee, ech mengen, ech froen de Marc. Mir waren nach ni zesummen op enger Hochzäit.
B: Et war just e Witz! Natierlech gees du mat dengem Frënd.
E Kaddo fir eng Hochzäit
A: Hey! So, kanns du mir hëllefen? Ech gouf op eng Hochzäit agelueden, mee ech si mir net sécher, wat ech als Kaddo matbrénge soll. Op der Invitatioun stoung och eng IBAN-Nummer, weess du, firwat déi kéint sinn?
B: A jo, dat ass ganz normal hei zu Lëtzebuerg. D’IBAN-Nummer ass meeschtens dofir, datt s du direkt Suen iwwerweise kanns. Et ass hei üblech, Sue fir d’Hochzäit ze schenken.
A: Wierklech? Suen?! Dat fannen ech komesch. Ass dat net onperséinlech? Bei eis an England géif een éischter e richtege Kaddo matbréngen. Eppes, wat fir d’Koppel nëtzlech ass oder eng Bedeitung huet. Zum Beispill e Service oder eng Dekoratioun mat den Nimm vun der Koppel. Sue géif bei eis kee schenken, héchstens e Bong.
B: Et ass interessant, wéi verschidden dat vu Kultur zu Kultur ass. Hei zu Lëtzebuerg an an den Nopeschlänner schenken d’Leit oft Suen, fir d’Hochzäitskäschten ze decken. Virun allem eng grouss Hochzäit ka séier an de Portmonni schloen. Ausserdeem notze vill Koppelen déi Suen, déi si fir hir Hochzäit kréien, fir hir Hochzäitsrees ze finanzéiert oder sech soss eppes ze gönnen. Heiansdo gëtt d’Koppel dat och spezifesch un, zum Beispill wa se fir eng grouss Rees oder en Haus spueren.
A: A, dat mécht Sënn. Mee schreift d’Koppel dat da wierklech schon an d’Invitatioun? Bei eis wier dat e bëssen, wéi soll ech soen, direkt?
B: Haha, jo, et ass vläicht e bëssen direkt, mee hei wierklech ganz normal. Heiansdo steet och e klenge Sproch oder en Hiweis an der Aluedung, zum Beispill ,,Eise Stot ass scho komplett, dofir géife mir eis iwwer e klenge Bäitrag fir eis Hochzäitsrees freeën.’’ Da wëssen d’Gäscht direkt Bescheed.
A: Dat ass wierklech ganz anescht, wéi ech et gewinnt sinn! Op deenen Hochzäiten, wou ech bis elo war, kruten d’Gäscht am Viraus eng Lëscht geschéckt mat Saachen, déi d’Leit direkt fir d’Koppel kafe konnten.
B: Dat ass och praktesch, an dovun hunn ech och schon héieren. Dat gëtt hei zu Lëtzebuerg oft gemaach, wann eng Koppel Nowuess kritt. Da gëtt et oft eng Lëscht, wou d’Leit e Kaddo fir de Puppelche kafe kënnen.
A: Dat ass praktesch! Mee, so, eng Fro hunn ech awer nach. Weess du, wéi vill Suen ech da schenke soll? Gëtt et do eng Reegel?
B: Eigentlech net, mee meeschtens kuckt een, wéi gutt een d’Koppel kennt, oder wéi vill d’Feier ongeféier kascht. Sou ëm déi 50 bis 150 Euro si schon üüblech, mee bei enke Frënn oder Familljemembere kann et natierlech och méi sinn.
A: Ok, dann iwwerleeën ech emol, wéi ech et maachen. Et kléngt op alle Fall méi einfach, wéi e grousse Kaddo matzebréngen, mee ech muss mech nach e bëssen un de Gedanke winnen.
B: Dat kann ech verstoen. Du kanns jo och eng schéi Kaart dobäileeën an d’Suen dodran iwwerreechen. Dat gëtt hei och oft gemaach a gesäit méi perséinlech aus.
A: O jo, dat ass eng gutt Iddi! Dat maachen ech! Merci fir deng Hëllef!
B: Et ass gär geschitt!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Zijn er afleveringen die ontbreken?

Klik hier om de feed te vernieuwen.
Vältesdag (B1)
11 feb· Poterkëscht vum INLL
Wëllkomm zréck an der Poterkëscht! E Freideg ass de 14. Februar, also Vältesdag. Haut lauschtere mir en Dialog, wou eng Koppel iwwer dëst Theema diskutéiert.
Vill Spaass beim Nolauschteren!
-
Transkript
Vältesdag
A: So, du weess jo, geschwënn ass Vältesdag.
B: Wat ass geschwënn?
A: Ma, Vältesdag.
B: Hei, nee, fänk net erëm un! Ech hunn dir dach d’lescht Joer schonn erkläert, datt ech dee blöden Dag net feieren.
A: Ech verstinn dat einfach net. Jidderee mécht eppes Romantesches deen Dag oder schenkt sengem Partner oder senger Partnerin eng Klengegkeet. Just ech kréie rëm näischt.
B: Wie vun eise Kolleege feiert dat dann, wannechgelift?
A: De Ben an d’Laure gi schick iessen, de Marco sot hie géing dem Vanessa Rousen op de Büro schécken an d’Marte bastelt dem Sven eppes.
A: A wat mécht de Sven dono domat? Et flitt an d’Poubelle.
B: Sief dach net esou.
A: Ech verstinn einfach net wat esou speziell un deem Dag ass. Dat ass einfach erfonnt ginn, fir rëm onnéideg Saachen ze verkafen a Suen domat ze maachen. Mengs du wierklech datt een am Februar Rouse kritt? Déi mussen dach vu wat weess ech wou importéiert ginn, fir datt mir eis domat beschenke kënnen. Also ëmweltfrëndlech ass et och emol net.
B: Jo, du hues jo Recht, mee et musse jo keng Rouse sinn. Du kanns mir jo och einfach eng léif Kaart schreiwen, mir Knippercher kafen oder mech an e Restaurant invitéieren.
A: Knippercher? Sos du net viru kuerzem du wéilts méi oppassen, wat s du ëss? Ausserdeem gi mir jo awer reegelméisseg an de Restaurant an ech schreiwen dir quasi all Dag, dass ech dech gär hunn. Ech weess net, wat een nach vun engem erwaarde kann.
B: Jo, du bass jo och e super Frënd an ech ka mech och net bekloen, mee ech sinn ëmmer e bësse jalous, wann ech héieren, datt déi aner eppes Flottes maachen oder kréien.
A: Also, wann dat dir wierklech esou wichteg ass, da kann ech mir jo eng afale loossen.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Vum Wantersport erzielen (B1)
6 feb· Poterkëscht vum INLL
Wëllkomm zréck an der Poterkëscht! Am Episod vum haut héiere mir, wéi d'Schivakanz vun de Frënn aus dem leschten Episod war a wat si alles gemaach hunn. Vill Spaass beim Nolauschteren!
-
Transkript:
Iwwert eng Schivakanz schwätzen
A: Hallo! An wéi war är Schivakanz? Schued, datt mir eis do net iwwert de Wee gelaf sinn. Ech war och do mat de Kanner
B: Jo, den Tony sot mir, dass dir och do waart, mee vläicht ass et och besser, datt mir eis net iwwert de Wee gelaf sinn.
A: Firwat dann dat?
B: O, well ech awer e puermol en décke Kapp hat. Mir ware quasi all Owend op den Après-ski an du weess, wéi dat geet.
A: O mam, jo! Wéi ech nach keng Kanner hat, war ech ëmmer dat éischt um Après-Ski. Mee wéi war är Vakanz dann nach esou?
B: Et war wierklech flott. Ech ginn immens gär an Éisträich an d’Bierger. Mir sinn dëst Joer och an der Nuecht gefuer a hate quasi kee Stau.
A: Mir maachen dat och mëttlerweil esou. Et ass e bëssen ustrengend, fir esou fréi opzestoen, mee et lount sech awer. Hat dir dann en Appartement oder en Hotel gelount?
B: Mir hunn en Appartement gelount. Du weess jo wéi deier ëmmer alles an der Schivakanz ass, dofir hu mir eis d’Käschte vum Appartement zu sechs gedeelt.
A: Zu sechs? Dat wier mir ze vill.
B: Am Ufank war och e bësse skeptesch, mee mir sinn awer all ganz gutt eens ginn an et war wierklech genuch Plaz do. Mir hate véier Schlofkummeren, zwee Buedzëmmer, nach eng separat Toilette an e Balcon mat Vue op d’Schipisten.
A: An dir hat awer keng Kichen a Living?
B: Ma dach, natierlech. Moies hu mir ëmmer zesummen an der Stuff Kaffi gedronk. Ausser den Tom , deen huet ëmmer bis 12 Auer geschlof an ass dann direkt Schi fuere gaangen.
A: Typesch! So, hues du och fonnt, dat et dëst Joer extreem deier war? Si hu jo iwwerall d’Präisser eropgesat. Wann et esou weidergeet, da weess ech net, ob mir eis dat nach fir véier Persoune leeschte kënnen.
B: Jo, also fir eng Persoun geet et nach, mee wann ech fir eng ganz Famill misst bezuelen, da géing ech mir et och zweemol iwwerleeën. De Präis vum Schipass ass net an d’Luucht gaangen, mee dofir awer d’Locatioun vum Schimaterial. Mir hunn all eng Helm, Schischong, d’Schi an d’Bengele gelount an dat war duebel esou deier, wéi d’lescht Joer.
A: Schlëmm..an d’Appartement?
B: Dat war nach ok, well mir jo zu sechs waren, mee et war och net geschenkt. Wat awer och deier war, war d’Iessen an d’Gedrénks an de Hütten an um Après-Ski. Ech hu 5€ fir eng Limonad bezuelt, de Béier huet 9€ kascht an d’Cocktaile 13€ an da ware se mol net gutt.
A: O mei. Mir hu just eemol an engem Restaurant um Bierg giess an dono hu mir eis ëmmer Schmiere matgeholl, well et einfach ze deier war. Ech menge mir ginn elo just nach all zweet Joer an de Wantersport. Mir musse jo och nach d’Schischoul fir déi Kleng bezuelen a fir siwen Deeg, gëtt dat eng deier Affaire.
B: Dat ass wierklech schued, well dat ass quasi déi eenzeg Plaz wou se nach gudde Schnéi hunn a wou net esou vill Konschtschnéi läit.
A: Jo, ech weess, do kann ee wierklech nach gutt fueren, mee wann et esou an de Portmonni geet, da kann een net méi all Joer goen.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
An de Wantersport fueren (B1)
4 feb· Poterkëscht vum INLL
Wëllkomm zréck an der Poterkëscht!
Haut héiere mir, wéi zwou Personen hir Walliss fir an de Wantersport paken. Duerno héiere mir e Gespréich am Auto. Vill Spaass beim Nolauschteren!
-
Den Transkript fir dësen Episod fannt dirhei (klick!). Dir braucht keen Account, klickt wgl. einfach op ,,Access as guest''.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Liichtmëssdag (B1)
30 jan· Poterkëscht vum INLL
Wëllkomm zréck an der Poterkëscht! Haut schwätze mir iwwer eng Lëtzebuergesch Traditioun, Liichtmëssdag. Wat dat genau ass, héiere mir haut. Vill Spaass beim Nolauschteren!
-
Transkript:
A: Hallo Luc! Ech hu viru Kuerzem vun enger lëtzebuergescher Traditioun héieren, déi ech nach net kennen: Liichtmëssdag. Kanns du mir soen, wat dat ass?
B: Natierlech! Liichtmëssdag gëtt zu Lëtzebuerg all Joer den 2. Februar gefeiert. Dat ass de Virowend vum Dag vum Hellege Blasius, an do ginn d’Kanner liichten.
A: Liichten ? A wat ass dat dann ?
B: D’Kanner gi vun Dier zu Dier, meeschtens a klenge Gruppen. Wann d’Kanner kleng sinn, ginn oft nach d’Eltere mat. Se hunn e Liichtbengel mat engem Lampion, dee si meeschtens an der Schoul gebastelt hunn. Se sangen e Lidd a kréien da meeschtens vun de Leit Kamellen oder Séissegkeeten.
A : Flott! Dat kléngt e bësse wéi Halloween, mee ouni Kostüm. Wat sangen d’Kanner dann?
B: Et ass en traditionnellt Lidd, mir nennen et ,,Léiwer Herrgottsblieschen’’. Et kléngt esou : (Lidd).
A : Schéin ! Mee ,,Speck an Ierbesse’’ ginn et hautdesdaags warscheinlech net méi, oder?
B: Nee, wéi ech gesot hunn, ginn et meeschtens Séissegkeeten oder alt emol e puer Euro.
A: Ok! A wéini kommen d’Kanner deen Dag meeschtens?
B: Oft gi se no der Schoul, also am Nomëtteg fort, mee heiansdo komme se och nach owes.
A: Gutt, da passen ech op, datt ech deen Dag e puer Kamellen oder Schockela am Haus hunn. Mee eng Fro hunn ech awer nach. Wien ass den ,,Herrgotssblieschen’’?
B: Ma dat ass den Hellege Blasius, ee vun deene 14 hellegen Nouthëllefer. En ass bekannt dofir, datt en d’Véi vun de Bauere schützt, mee och géint Halswéi, Geschwier an d’Pescht hëlleft.
A: Wow, du weess wierklech vill. Ech froen dech dann d’nächst Kéier, wann ech zu enger anerer Traditioun eng Fro hunn!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
En Jobinterview (A2)
28 jan· Poterkëscht vum INLL
Wëllkomm zréck an der Poterkëscht! Am Episod vun haut lauschtere mir en Jobinterview. Vill Spaass beim Nolauschteren!
-
Transkript:
En Jobinterview
Accueil: Gudde Moie Monsieur.
B: Gudde Moien. Ech hunn elo um 10:15 Auer, e Rendez-vous fir en Entretien.
A: Wéi ass Ären Numm wgl.?
B: Ech heesche Bertrand Lafontaine.
A: Kënnt Dir Ären Numm buschtawéieren, wannechgelift?
B: Jo, natierlech. Mäi Virnumm ass B-E-R-T-R-A-N-D. Mäi Familljennum ass L-A-F-O-N-T-A-I-N-E.A: Ajo, ech gesinn. Dir sidd op der Lëscht. Dir kënnt elo hei de Lift huelen an op den 12. Stack fueren. Do kënnt Dir nach ee Moment an der Salle d’attente waarden. Eis Direktesch kënnt Iech pünktlech sichen.
B: Merci.
...
Direktesch: Här Lafontaine wgl.
B: Jo. Dat sinn ech.
D: Kommt mat a mäi Büro wgl. Huelt Iech Plaz.
B: Merci. Dir hutt wierklech eng schéi Vue op de Park.
D: Dat stëmmt. Ech si ganz zefridden. Da fänke mir mol un… An Ärem Dossier steet, dass Dir momentan zu Diddeleng wunnt. Ass dat korrekt?
B: Jo, dat stëmmt. An der rue de l’avenir, op der Nummer 27.
D: Vu wou kommt Dir?
B: Ech kommen aus Frankräich, vu Montpellier.
D: Wou schafft Dir de Moment?
B: Ech schaffen de Moment als Finanzspezialist op enger Bank.
D: Wat hutt Dir virdru gemaach?
B: Ech hu virdrun als Comptabel bei ZonAma geschafft.
D: Wat maacht Dir dann elo op der Aarbecht?
B: Ech beroden d’Clienten, analyséieren a suivéieren d’Finanzmarchéen an ech organiséiere Reuniounen.
D: Firwat sicht Dir eng nei Aarbecht?
B : Ech hunn den Ament e CDD, e contrat à durée déterminée, dee just bis Juli 2025 geet. Wat fir e Profil sicht Dir?
D: Mir sichen eng Persoun mat 5 Joer Beruffserfarung. Et ass eis och wichteg, datt d’Persoun op d’mannst zwou vun den dräi offizielle Sprooche vum Land gutt schwätzen a schreiwe kann. Wéi vill Joer Beruffserfarung hutt Dir?
B: Jo, ech hu schonn 10 Joer Erfarung an dësem Beräich an ech hunn och 5 Joer Auslandserfarung. Ech hunn an Indien, an den USA an och an England geschafft.
D: Jo. Firwat wëllt Dir bei eis schaffen?
B: Well Dir d‘Nummer 1 an Ärem Domän sidd an ech sinn iwwerzeegt, datt ech mech an Ärer Firma weiderentwéckle kann. D‘Aarbechtsklima schéngt mer hei dynamesch a kreativ ze sinn, wat mech immens motivéiert.
D: An der Rei Monsieur Lafontaine. Hutt Dir eventuell nach Froen un eis?
B: Jo, wéi vill Kandidaten hutt Dir?
D: Mir hu ganz vill Kandidate fir dëse Posten.
B: Wéini kréien ech vun Iech eng Äntwert?
D: Mir kontaktéieren Iech bannent enger Woch.
B: An der Rei. Merci, datt Dir mech invitéiert hutt.
D: Mir soen Iech Merci fir Ären Interessi.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Hobby: Badminton (A2)
23 jan· Poterkëscht vum INLL
Wëllkomm zréck an der Poterkëscht!
Haut hu mir den Emmanuel bei eis am Studio. Hien erzielt eis e bëssen iwwer säin Hobby, Badminton spillen, a säin Engagement an engem Veräin zu Lëtzebuerg.
Vill Spaass beim Nolauschteren!
-
Transkript:
A: Wëllkomm zréck an der Poterkëscht! Haut hu mir den Emmanuel bei eis am Studio. Hien erzielt eis e bëssen iwwer säin Hobby, a wéi et dozou komm ass, datt hie President vun engem Veräin ginn ass.
Moien, Emmanuel! Kanns du dech kuerz virstellen?
B: Moien! Ech heeschen Emmanuel, ech sinn 38 Joer al. Ech kommen aus Frankräich a wunnen zu Lëtzebuerg zanter 2009.
B:  Elo wunnen ech am Rollingergronn, (no bei der Stäreplaz).
A: Wat ass däin Hobby?
B: Dat ass Badminton. Awer dat ass méi wéi en Hobby: dat ass eng Leidenschaft!
A: Zanter wéini méchs du dat schonn?
B: Ech war 11 Joer al, wéi ech ugefaang hunn, Badminton ze spillen. Ech hu 7 Joer gespillt an dann hunn ech missen ophale fir d’Schoul/(Uni). Ech hunn erëm ugefaang wéi ech 2009 op Lëtzebuerg komm sinn.
A: Wéi hues du Lëtzebuerg ugefaang?
B: 2009 hunn ech um Lampertsbierg gewunnt. Also hunn ech um Site vun der Federatioun no engem Veräin no bei mengem Appartement gesicht, and dat war de Badminton Club Européen zu Dommeldeng.
A: Du bass elo President vum Veräin. Wéi ass et dozou komm?
B: Gutt Fro, haha. De Veräin war kleng, wéi ech ugefaang hunn. De Comité war net ganz motivéiert. Ech hat d’Iddi, fir Aktivitéiten ze maachen, oder méi Competitiounen ze spillen. An dunn huet de President mir eng Plaz an dem Comité offréiert, an ech hunn acceptéiert. Mir waren deemools 25 Spiller, an haut, si mir 130 Spiller. Mir haten eng Mannschaft fir Erwuessener an dem Championnat, an haut hu mir 5 Ekippe fir Erwuessener an zwou Jugendekippen an dem Championnat.
A: Interesséiere sech vill Jugendlecher fir de Sport?
B: Jo, méi a méi. Dat ass ganz gutt fir de Badminton zu Lëtzebuerg. D’Federatioun wëll méi Saache maache fir méi Jugendlecher un d’Spillen ze kréien, mat der Iddi, datt Lëtzebuerg een oder zwee Spiller fir déi nächst Olympiad huet!
A: Cool! A ginn et vill Benevollen?
B: Net vill, awer genuch. Ech hätt gär e puer Benevollen méi, fir méi Aktivitéiten ze maachen, mee mir hu genuch Benevolle fir datt de Veräin gutt funktionéiert.
A: Ech verstinn. An nach eng lescht Fro: Si vill aner Expats am Veräin aktiv?
B: A mengem Veräin, jo. Mee an der Federatioun si mir net esou vill Expats, fir ze hëllefen. An dem Comité vun de Federatioun ass een Expat vun 10 Memberen. A mengem Veräin an am Comité hu mir ee Lëtzebuerger vun 8 Memberen. Mir sinn den eenzege Veräin an der Stad, an dofir méi international wéi aner Clibb.
A: Interessant! Merci, Emmanuel, datt s du haut bei eis am Episod waars.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Am Reesbüro (A2)
21 jan· Poterkëscht vum INLL
Wëllkomm zréck an der Poterkëscht!
Haut héiere mir en Dialog, an deem eng Koppel sech am Reesbüro iwwer hir Vakanz beschwéiert.
Vill Spaass beim Nolauschteren!
-
Transkript:
Am Reesbüro
A: Gudde Moien, Madamm Müller! Mir musse mat Iech iwwer eis lescht Vakanz schwätzen. Mir si wierklech enttäuscht!
C: Gudde Moien, Här a Madamm Weber! O jee, dat deet mir awer leed. Wat ass da genau geschitt?
B: Éierlech gesot goung sou zimmlech alles schif, wat hätt kënne schifgoen! Fir d’éischt war d’Hotelszëmmer an engem fuerchtbaren Zoustand, wéi mir ukomm sinn! Et war stëbseg, d’Dreckskëscht war nach voll an et waren Hoer am Lavabo am Buedzëmmer an am Bett.
C: O mei, dat kléngt wierklech desagreabel. Hutt Dir dat dann dem Hotel gemellt?
A: Natierlech! Mee mir krute gesot, datt keen anert Zëmmer fräi ass, an datt d’Botzpersonal sech eréischt muer dorëms këmmere géing, well et schonn owes war. Net ze gleewen, oder?
C: Dat deet mir wierklech leed. Esou e Service ass natierlech inakzeptabel. Goufen et nach weider Problemer?
B: Allerdéngs! D’Iesse war eng eenzeg Katastroph. Mir hate jo Hallefpensioun gebucht, a moies an owes gouf et Buffet. Mee et gouf all Dag dat selwecht, an dat, wat et gouf, war entweeder ze fetteg, versalzt oder scho kal. Een Owend lounge mir souguer nuets mat Bauchwéi am Bett!
A: An dann nach dee Kaméidi! Den Hotel war direkt nieft engem Chantier, wat eis virdrun net gesot gouf. De ganzen Dag hu mir bei der Schwämm de Kaméidi vu Baggeren a Maschinnen héieren. Wéi soll een do entspanen?
C: Dat kléngt wierklech fuerchtbar. Ech verstinn Är Roserei. Hutt Dir wärend Ärem Openthalt probéiert, d’Reeseleedung op der Plaz ze kontaktéieren?
B: Jo, mee do hu mir entweeder keen erreecht oder mir goufe vertréischt. Mir hate wierklech d’Impressioun, datt keen eis hëllefe wollt.
A: Ganz éierlech, esou eppes hu mir nach ni erlieft. Mir si richteg rosen an hätte gär eng anstänneg Entschiedegung!
C: Dat verstinn ech total. Kommt, ech notéieren alles, datt mir eng Reklamatioun un den Organisateur weiderleede kënnen. Mir kënnen op e Remboursement oder op d’mannst op eng Entschiedegung a Form vun engem Reesbong insistéieren.
B: E Reesbong? Also, no dëser Erfarung weess ech net, ob mir jee erëm bei Iech buche wäerten!
C: Dat verstinn ech ... Ech maache mäi Bescht, fir e Remboursement a Form vu Suen ze kréien. Hutt Dir Fotoen oder aner Beweiser, déi mir mat eraschécke kënnen?
A: Jo, natierlech. Mir hunn alles dokumentéiert: Fotoe vum Zëmmer, vum Iessen an natierlech Videoe vun der Baustell.
C: Dat hëlleft scho vill, Merci. Ech schécken Är Reklamatioun direkt eran a wäert mech dofir asetzen, datt Dir eng fair Léisung kritt. Kann ech Iech déi nächst Deeg per Telefon kontaktéieren, fir Iech en Update ze ginn?
B: Dat wier gutt. Mir hoffen, datt Dir Iech seriö dorëms këmmert!
C: Selbstverständlech. Et deet mir wierklech leed, datt Är Rees esou eng Enttäuschung war. Ech wäert alles dofir maachen, fir dat erëm gutt ze maachen.
A: Merci. Mee, éierlech gesot, hätte mir eis deen Ierger gär erspuert.
C: Dat verstinn ech. Nach eng Kéier, et deet eis leed. Ech melle mech esou séier wéi méiglech.
B: Ech sinn zwar elo gespaant, ob do wierklech eppes dobäi erauskënnt. Dës Kéier loosse mir eis net uschmieren!
A: Genau! An d’nächst Kéier recherchéiere mir selwer besser, bevir mir buchen.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Am Sproochecafé (A1)
16 jan· Poterkëscht vum INLL
Wëllkomm zréck an der Poterkëscht!
Am Episod vun haut héiere mir en Dialog tëschent zwou Persounen, déi an engem Sproochecafé matenee schwätzen. Vill Spaass beim Nolauschteren!
-
Transkript:
Am Sproochecafé
Organisatrice: Moien an häerzlech Wëllkomm hei zu Luerenzweiler an eisem Sproochecafé! Dir kënnt hei véier Sproochen schwätzen an trainéieren. Op der rietser Säit, hei vir, ass den Dësch fir Däitsch, riets, bei der Dier, ass Lëtzebuergesch, niewendrun ass Franséisch an do ass den Dësch, fir Englesch ze schwätzen. Huelt Iech Plaz an installéiert Iech.
Beatriz: Moien!
Jamie: Moien!
B: Wéi heeschs du?
J: Ech heeschen Jamie. An du?
B: Ech heesche Beatriz.
J: Et freet mech!
B: Mech och!
J: Wéi geet et dir ?
B : Mir geet et gutt. Ech sinn e bësse midd. Wéi geet et dir?
J: Mir geet et tipptopp!
B: Vu wou kënns du?
J: Ech kommen aus Schottland, vun Danestone.
B: Wou ass dat?
J: Kenns du Aberdeen? Et ass ganz no bei Aberdeen.
B: A ok! Jo, ech hu scho vun Aberdeen héieren.
J: Vu wou kënns du?
B: Ech sinn a Portugal gebuer, mee ech kommen aus Spuenien. Mäi Papp ass Portugis a meng Mamm ass Spuenierin. Si hunn a Portugal studéiert an hu sech do kenne geléiert.
J: Cool! Wunns du scho laang zu Lëtzebuerg?
B: Ech wunnen zënter véier Joer zu Lëtzebuerg. Wéi laang wunns du schonn zu Lëtzebuerg?
J: Säit fënnef Joer.
B: Wéi laang léiers du scho Lëtzebuergesch?
J: Säit ongeféier 4 Joer, an du?
B: Säit zwee Joer? Oder zweeanhallef Joer?
J: Wat fir Sprooche schwätz du nach?
B: Portugisesch, Spuenesch, Franséisch, e bëssen Englesch an e bësse Lëtzebuergesch. An du?
J: Ech schwätzen Englesch a Lëtzebuergesch. De Moment léieren ech Franséisch am INLL. Et ass immens schwéier fir mech. Ech muss och nach méi Lëtzebuergesch schwätzen. Op menger Aarbecht schwätze mir just Englesch, duerfir sinn ech hei am Sproochecafé, fir Lëtzebuergesch ze schwätzen.
B: Jo, ech schwätzen och net genuch Lëtzebuergesch. Ech wëll mech och nees an e Lëtzebuergeschcours am INLL aschreiwen. De Sproochecafé ass flott, mee en ass just ee Mol de Mount.
J: Jo, dat ass wouer.
B: Wat bass du da vu Beruff?
J: Ech schaffen als Informatiker am CTIE, de Centre des technologies d’information de l’Etat.
B: Mega! Ech sinn och Informatikerin! Ech schaffen awer am Privatsecteur.
J: A, cool! Wéi gefält et der?
B: D’Aarbecht gefält mir ganz gutt, mee et ass ustrengend. De Moment schaffen ech oft méi wéi aacht Stonnen ; heiansdo zéng, heiansdo zwielef Stonnen.
Wat sinn dann deng Hobbyen?
J: Jo, dat kléngt wierklech no vill! Ech hoffen, et gëtt geschwë besser! Ech gi gär lafen, mee ech spillen och Basket. Heiansdo trainéieren ech och mat de Kanner.
B: A, hues du Kanner?
J: Nee nee, ech sinn heiansdo Trainer vun de Kanner a mengem Basketsclub!
B: Aaa! Elo verstinn ech!
J: Kee Problem! Ech verstinn och net ëmmer direkt alles. Mir mussen nach méi Lëtzebuergesch üben.
B: Jo! Hues du Loscht an Zäit de Weekend eppes drénken oder iessen ze goen? Da kënne mir nach méi schwätzen!
J: Gär! Wéini? E Freideg oder e Samschdeg? Mëttes? Owes?
B: Hues du e Samschdeg den Owend Zäit?
J: Jo, dat geet. Treffe mir eis an der Stad?
B: Jo. Op der Plëss virum Cercle?
J: Tipptopp! Um wéi vill Auer?
B: Tëschent siwen an aacht?
J: Um hallwer aacht?
B: Perfekt! Wéi ass deng Handysnummer?
J: Meng Nummer ass 671 987 654.
B: Ech schécken der en Emoji, dann hues de meng Nummer och.
J: Perfekt!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Interview mam Maisy Gorza (B2)
14 jan· Poterkëscht vum INLL
Wëllkomm zréck an der Poterkëscht!
Haut hu mir d'Maisy Gorza, d'Directrice vum INLL bei eis am Studio. Mir schwätze mat him zesummen iwwer den INLL. Vill Spaass beim Nolauschteren!
--
Fir dësen Episod ass keen Transkript disponibel.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Hobby: Trail Lafen (A2)
9 jan· Poterkëscht vum INLL
Wëllkomm zréck an der Poterkëscht! Am Episod vun haut schwätze mir mam Güneş iwwer säin Hobby, Trail lafen. Vill Spaass beim Nolauschteren!
-
Transkript:
A : Wëllkomm an der Poterkëscht! Haut schwätze mir erëm eng Kéier iwwer Hobbyen. Mir hunn dofir en Apprenant aus dem INL bei eis am Studio, de Güneş. Wëllkomm am Studio!
B: Moien!
A: Güneş, du léiers de Moment Lëtzebuergesch. Zanter wéini?
B: Ech léieren zanter engem Joer Lëtzebuergesch. Et ass net einfach!
A: Dat ass wouer, mee du schwätz scho ganz gutt. Haut schwätze mir iwwer däin Hobby. Du leefs gär, oder?
B: Jo, dat ass richteg. Mäin Hobby ass virun allem Trail lafen.
A: Dat kléngt interessant. Kanns du eis erklären, wat Trail lafe genau ass?
B: Jo. Beim Trail lafe leeft een net op der Strooss, mee op Weeër an der Natur, zum Beispill am Bësch, an de Bierger oder op Felder.
A: Dat kléngt no Abenteuer! Firwat gefält dir Trail lafen esou gutt?
B: Ech hunn d’Natur immens gär. Ech kann Déiere gesinn an déi frësch Loft deet gutt. An natierlech ass et och gutt fir mäi Kapp a fir mäi Kierper.
A: Ech verstinn. Wéi oft gees du Trail lafen?
B: Normalerweis lafen ech zwee bis dräi Mol d’Woch. Ech maachen och nach Kraafttraining eleng oder mat engem Grupp dobaussen. De Weekend maachen ech oft méi laang Leef, heiansdo méi wéi 20 Kilometer.
A: Wow, dat ass vill! Hëls du och u Competitiounen deel?
B: Jo, ech si viru Kuerzem den Uewersauertrail zu Lëtzebuerg gelaf.
A : A wéi preparéiers du dech op esou eng Course?
B: Ech trainéiere vill, iesse gesond an drénke vill Waasser. An ech schlofe genuch.
A: Dat ass wichteg. Géifs du mir oder eisen Nolauschteren Trail lafen och recommandéieren ?
B: Natierlech ! Et mécht Spaass an et ass gutt fir d’Gesondheet. Et brauch ee just gutt Schong a Motivatioun.
A: Merci! Da probéieren ech dat eventuell deemnächst eng Kéier. Merci, datt s du haut hei waars an eis vun dengem Hobby erzielt hues.
B: Merci fir d’Invitatioun!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Virsätz fir dat neit Joer (A2)
7 jan· Poterkëscht vum INLL
Wëllkomm zréck an der Poterkëscht! Am Episod vun haut schwätze mir e bëssen iwwer Virsätz fir dat neit Joer. Vill Spaass beim Nolauschteren!
-
Transkript:
Virsätz fir d’neit Joer
A: Wëllkomm zréck an der Poterkëscht ! Am Episod vun haut schwätze mir iwwer Virsätz fir d’neit Joer. Dat passt, oder?
B: Absolut! Ech huele mir ëmmer gär e puer gutt Virsätz, och wann ech se meeschtens am Februar schonn opginn.
C: Max, du bass net eleng! Ech denken, vill vun eis fänken d’Joer voller Energie un, mee duerchzehalen, dat ass eng aner Saach.
A: Dofir schwätze mir jo haut driwwer. Vläicht hëllefen eis Tipps a Virsätz jo eisen Nolauschterer, motivéiert ze bleiwen. Also, loost eis direkt ufänken. Wat sinn är Virsätz fir dat neit Joer?
C: O je, wou soll ech ufänken? Mäin Haaptvirsaz ass, méi Sport ze maachen. D’lescht Joer hunn ech esou oft gesot : ,,Ab muer ginn ech lafen !’’ Mee … ,,muer’’ koum iergendwéi ni.
B : Klassiker! Mee, Sarah, wat heescht dat elo konkreet? Gees du elo all Moien um sechs Auer lafen?
C: Um sechs? Vergiess et! Ech wëll realistesch bleiwen. Ech ginn zwee Mol d’Woch lafen, dat geet fir de Moment duer. Vläicht mellen ech mech am Fréijoer fir e Vollekslaf un, fir e klengt Zil ze hunn.
A: Dat kléngt dach realistesch! Ech fannen, kleng Ziler sinn immens wichteg.
B: Jo, mee Jil, ech si mer sécher, datt s du dëst Joer nees ee vun deenen immens éiergäizege Virsätz hues.
A: E bëssen, jo. Ech wëll endlech mäin éischt Buch schreiwen.
C: Wow! An, hues du schonne Plang?
A: Jo. Ech hu mir virgeholl, all Dag op d’mannst eng Stonn ze schreiwen. Dat kléngt no net vill, mee ech hoffen, datt ech esou bis de Summer e klengen Entworf hunn.
B: Respekt! A wat méchs du, wann d’Motivatioun noléisst?
A: Gutt Fro. Ech wëll mir eng speziell Plaz ariichten, wou ech ouni Oflenkung schaffe kann. An ech hunn enger Frëndin dovun erzielt, déi mech reegelméisseg froe wäert, wéi et leeft. Esou hunn ech e bëssen Drock.
C: Kléngt gutt. Vläicht soll ech och een hunn, dee mech reegelméisseg freet, ob ech lafe war.
B: O, do hëllefen ech gär! Ech ruffen einfach all Méindeg un a froen, ob s du scho lafe waars.
C: Ha ha. Max, wat sinn dann deng Virsätz?
B: Bei mir geet et ëm d’Iessen. Ech wëll manner Fast Food iessen a méi selwer kachen.
C: Dat ass dach gutt ! Mee ech hu geduecht, du wiers esou frou mat Burgeren a Pizza?
B: Dat sinn ech och! Mee ech hunn d’lescht Joer gemierkt, datt ech mech no esou vill fettegem Iessen oft midd fillen. Dofir wëll ech et op eemol d’Woch reduzéieren. An: Ech wëll léieren, e puer einfach Platen ze kachen.
A: Dat kléngt jo no engem Challenge. Weess de schonn, wat s de kache wëlls ?
B: Jo! Ech hu mir schonn dräi Rezepter erausgesicht: e Curry, eng selwergemaache Pizza – gesond, natierlech – a Lasagne.
C: O, ech komme laanscht, wann s de d’Lasagne méchs!
B: Deal ! Mee dir däerft eréischt kommen, wa se net méi no ‘’Kachufänger’’ schmaacht.
A: Okay, also als Resümmee: d’Sarah wëll méi lafen, de Max wëll manner Fast Food iessen a besser kachen, an ech schreiwen e Buch. Wat denkt dir, wéi grouss sinn d’Chancen, datt mir dat duerchzéien?
C: Hmm, soe mer 70 Prozent?
B: Also, ech gi mir selwer 50 Prozent. Mee wann dir reegelméisseg nofrot, wéi et leeft, klammen d’Chancë vläicht op 60 Prozent.
C: Haha, da komm, mir maachen en Deal: Ech froen dech no denge Kachkënscht, an du erënners mech, lafen ze goen.
A: An dir frot mech no mengem Buch! Esou motivéiere mir eis géigesäiteg.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Vun enger Sylvesterfeier erzielen (A2)
2 jan· Poterkëscht vum INLL
Wëllkomm zréck an der Poterkëscht!
Haut héiere mir, wéi zwou Persounen iwwer hire Sylvesterowend schwätzen. Vill Spaass beim Nolauschteren.
-
Transkript:
A: Prost a vill Gléck am neie Joer!
B: Prost! Och fir dech, virun allem eng gutt Gesondheet. Gëschter war jo mol e lëschtegen Owend.
A: Gell. Bis wéi vill Auer bass du bliwwen?
B: O Mamm, vill ze laang.
A: Firwat sees de dat?
B: Ma de Christian huet net opgehalen eis ëmmer rëm Wäin nozeschëdden an iergendwann hate mir all eng hänken.
A: O nee, wéi witzeg! Wéi schued datt ech dat verpasst hunn!
B: Hal op! Ech si frou, datt net vill Leit dat matkruten. De Josy ass souguer op sengem Stull ageschlof. Hien huet natierlech och d’Freedefeier verpasst. An iwweregens, firwat bass du dann esou fréi heemgefuer?
A: Éierlech gesot war et mir nom Haaptplat immens schlecht an dofir sinn ech mol net bis zwielef Auer bliwwen. Ech wollt onbedéngt méi laang do bleiwen, fir mat deenen aneren nach ze schwätzen, ze danzen an natierlech och op dat neit Joer unzestoussen.
B: Jo, ech hat schonn deng Kippche preparéiert, mee do waars du scho fort. Wat fir e Menü has du da gewielt? Vläicht hues de eppes net verdroen. Also mir huet alles ganz gutt geschmaacht.
A: Ech hat d’Tëntefëschzalot als Entrée an dono hat ech de Bœuf bourguignon. Wéi gesot, den Dessert krut ech net méi ze schmaachen.
B: Komesch! Ech hat dat selwecht!
A: Ech muss och zouginn, ech hat beim Aperitif schonn 3 Couppen op den eidele Mo gedronk. Dat kann et och gewiescht sinn.
B: A! Ma do hu mer et jo! Et war bestëmmt dat! Ech weess dass d’Manuela immens vill Wäert drop leet, wat fir en Traiteur et kontaktéiert. Wéi et virun e puer Joer och eng Feier organiséiert huet, hate ganz vill Leit eng Liewensmëttelvergëftung an dat soll sech elo net méi widderhuelen?
A: Sécher! Dat mat der Liewensmëttelvergëftung wosst ech guer net. Do hunn ech iech all nach net kannt.
B: Gleef mer, dat war net schéin! Dofir huet et sech awer dëst Joer extra Méi ginn. Den Dësch war immens schéin dekoréiert, et huet e gudden Traiteur fonnt, et gouf gudde Wäin a kuerz viru Mëtternuecht krute mir eng Coupe Cremant a Späizmännercher. Dat war wierklech flott.
A: Jo, ech hunn är Fotoe gesinn, déi si richteg flott gi mat de Späizmännercher. Ech war e bësse jalous.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
E chatoescht Chrëschtdagsiessen (A2)
26 dec 2024· Poterkëscht vum INLL
Wëllkomm zréck an der Poterkëscht! Mir hoffen, datt dir schéi Feierdeeg hat. Am Episod vun haut erziele mir vun engem chaotesche Chrëschtdagsiessen. Vill Spaass beim Nolauschteren!

-

Transkript:

B: Hallo! Wéi geet et dir?

A: Hallo! Gutt an dir? Wéi waren deng Feierdeeg ?

B : Jooo…hmm… Hellegowend war immens schéin, mee Chrëschtdag selwer war fuerchtbar!

A: Wéi? Wat ass da geschitt?

B: Am Ufank war nach alles an der Rei. Mir hunn e puer Kippercher Cremant gedronk – verschiddener, menger Meenung no, e puer ze vill – an derbäi gouf et immens gutt Aperitifskichelcher, vun deem neien Traiteur do, vun deem ech der erzielt hat.

A: A jo!

B: Als Entrée gouf et fir d’éischt eng Héngerbritt, déi meng Bomi matbruecht hat an nach Saumon fumé mat Toasten. A propos, meng Bomi huet quasi déi ganzen Zäit geschwat: iwwer hir Kandheet, iwwer déi nei Dirigentin vun hirem Gesank,... A se huet och iwwer sou vill Leit, déi mir guer net kennen, geschwat a gelästert. Dat huet wierklech genervt.

A: Ok. An dunn?

B: Duerno gouf et e Brot an als Bäilag kleng Gromperegratinen a roude Kabes.

A: Nee, nee! Wat ass du geschitt?

B: Maja, waart! Mäi Monni, dee scho vill ze vill Wäi gedronk hat, huet sech opgereegt, datt de Kabes versalzt wier. Menger Mamm ass bal de Kolli geplatzt! Si kann hirer Schwëster hire Mann souwisou schonn net leiden. Glécklecherweis huet awer keen e Sträit ugefaang. Bon, als Dessert hate mer eng Bûche. Meng Schwëster mécht se all Joer selwer. Et ass wierklech déi bescht Bûche, déi ech jee giess hunn, eng Schockelasbûche.

A: Mh hm.

B: Obwuel mer scho laang sat waren, gouf et beim Kaffi nach kleng Stollen a Kichelcher.

A: Dat kléngt wierklech no vill...

B: Jo, dat Gefréiss all Joer...et ass mer all Kéiers ze vill. Mee lo awer: Meng Tatta, mengem Papp seng Schwëster, hat hiren Hond matbruecht. Dat huet eiser Kaz net esou gutt gefall. Den Hond huet si sou erféiert, datt se an de Chrëschtbeemche gesprongen ass. De Beemchen ass dunn ëmgefall. Wéi mir e rëm opgeriicht hunn, hu mer gemierkt, datt den Adventskranz gebrannt huet. De Beemchen hat d’Käerzen ëmgeheit. Mir sinn alleguer esou erféiert a woussten am éischte Moment net, wat maachen. Mäi Monni, dee grad en Tëmpche gehalen huet, well en ze vill gedronk hat, huet vu Schreck säi Glas Wäin op d’Feier geheit. Dat huet natierlech näischt gehollef. Meng Mamm huet dunn awer geschalt an de Brand mat dem Waasser aus dem Krou geläscht.

A: O vreck! Wat e Chaos! Dat ass jo wierklech wéi an engem Film! Dann hoffen ech, datt wéinstens däi Silvester besser gëtt!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
De Wanter a Wanterpneuen (A2)
19 dec 2024· Poterkëscht vum INLL
Wëllkomm zréck an der Poterkëscht! Haut schwätze mir e bësse méi allgemeng iwwer de Wanter, an duerno héiere mir, wéi zwou Persounen iwwer d'Wanterpneue schwätzen.
-
Transkript:
De Wanter
Am Wanter ass et zu Lëtzebuerg kal, net grad esou kal wéi an den nërdleche Länner, mee et kënnen awer och Minusgrade ginn. Meeschtens sinn d’Temperaturen ëm déi 5 Grad an et reent och vill. Zu Lëtzebuerg schneit et leider net méi vill, mee wann ee mol Chance huet an et schneit, da sollt een definitiv mam Schlitt fuere goen. Eng aner Aktivitéit, déi mer am Wanter maache kënnen, ass Schlittschong fueren. D’Leit ginn dofir oft op d’Kockelscheier. Do kann ee Schlittschong ausléinen an et ausprobéieren. Wann ee léiwer eppes méi Gemittleches maache wëll, da kann een op de Chrëschtmaart goen an eppes Leckeres iessen an drénken. Um Chrëschtmaart kann ee Glüwäin drénken, dann ass et engem direkt manner kal an et kann een zum Beispill Gromperekichelcher, verschidde Wurschten, Tartifletten, Eisekuchen an nach aner Saachen iessen. A wa mer schonn iwwert d’Iesse schwätzen, da kënne mer och soen, dass am Wanter vill Raclette giess gëtt. Et gëtt ee bei Kolleegen invitéiert, oder et invitéiert ee selwer Leit bei sech. Fir Leit, déi net gär kachen ass dat perfekt, well et muss ee just den Apparat umaachen a fir de Rescht zerwéiert jidderee sech selwer. Mmmm, elo hunn ech zwar Loscht op eng Raclette!
Diskussioun Wanterpneuen
A: So, mengs du net, du misst mëttlerweil deng Wanterpneuen op den Auto montéiere loossen?
B: Nee, firwat dann dat? D’Wieder ass jo nach an der Rei.
A: Elo nach! An e puer Deeg soll et schneien an du wëlls jo net mat denge Summerpneuen am Schnéi fueren.
B: Ech kucken als éischt emol, ob et iwwerhaapt Schnéi gëtt an dann decidéieren ech dat.
A: Maach wéi s de wëlls, mee du weess jo, wann s du vun der Police ugehale gëss, da muss du 74€ bezuelen an du muss däin Auto op der Plaz stoe loossen. An du sos dach, du fiers de Weekend fort, nee?
B: O nee... Ech muss dir eppes beichten... Ech mengen ech hunn iwwerhaapt keng Wanterpneuen.
A: Wat?! Hues du se nach all? Dat ass jo extreem geféierlech.
B: Et deet mer leed. Ech hunn den Auto jo eréischt kaf an hunn net dru geduecht, dass ech och nach nei Pneue misst kafen. Ech weess emol net, wat fir Pneuen ech um Auto hunn.
A: O mei! Dat ass wierklech typesch! Da komm mir gi mol kucken.
A: Mäin Auto ass mega schéin, oder? An déi Faarf passt och voll bei mech.
B: Jo, jo, Haaptsaach d’Faarf passt. Da looss mech elo mol deng Pneue kucken.
A: Ça va.
B: Uff! Du hues Allweatherpneuen dat ass jo nach an der Rei.
A: Wou gesäit een dat iwwerhaapt?
B: Kuck. Hei steet M+S, dat steet fir “mud and snow”, also Bulli oder Mätsch a Schnéi, an dat ass d’Zeeche fir d’Allweatherpneuen.
B: A wéi erkennen ech déi aner Pneuen?
A: Bei de Wanterpneue steet och M+S drop, mee et ass och nach e Symbol mat engem Bierg an enger Schnéiflack dran, direkt niewendrun.
B: Aha! A wat fir en Zeeche gesinn ech bei de Summerpneuen?
A: Dofir gëtt et keen Zeechen. Dat heescht, wa guer keen Zeechen drop ass an och net M+S drop steet, da sinn et Summerpneuen.
B: Dat ass alles sou komplizéiert. Ab wéini muss ech d’Wanterpneuen um Auto hunn?
A: Et gëtt kee richtegen Datum, mee du muss der bei Schnéi a bei Glatäis drop hunn.
B: Ok, da sinn ech jo lo gutt informéiert.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
De Stot an d'Hausregelen (A2)
17 dec 2024· Poterkëscht vum INLL
Wëllkomm zréck an der Poterkëscht! Am Episod vun haut héiere mir fir d'éischt, wéi eng Koppel iwwer déi verschidden Aufgaben am Stot schwätzt. Duerno héiere mir, wéi eng Persoun en Zëmmer an enger WG kucke geet.
-
Den Transkript fir dësen Episod kënnt méi spéit no.
Merci fir Är Gedold!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
D'Heavy-Metal-Zeen zu Lëtzebuerg (B2)
12 dec 2024· Poterkëscht vum INLL
Wëllkomm zréck an der Poterkëscht!
Am Episod vun haut schwätze mir mam Gilles iwwer d'Heavy-Metal-Zeen zu Lëtzebuerg. Vill Spaass beim Nolauschteren!
-
Den Transkript fir dësen Episod kënnt dir hei (klick) noliesen. Klickt wgl. uewe riets op ,,Access as guest''.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
E Rendez-vous beim Coiffer a Kiné huelen (A2)
10 dec 2024· Poterkëscht vum INLL
Wëllkomm zréck an der Poterkëscht!
Haut héiere mir, wéi eng Persoun beim Coiffer a beim Kiné urifft, fir e Rendez-vous auszemaachen.
Vill Spaass beim Nolauschteren!
---
Transkript:
Nathalie : O mei, meng Hoer gesi wierklech fuerchtbar aus. Ech hunn zwar net vill Zäit, mee ech muss onbedéngt e Rendez-vous beim Coiffer huelen. Am beschte muer … oder vläicht en Donneschdeg ? Hoffentlech hu se nach eppes fräi … Ech ruffen emol un a froen.
C : Gudde Moien, Salon ,,Schnipp Schnapp’’, wéi kann ech Iech hëllefen?
N : Moien, hei ass d’Nathalie Silva. Ech géif gär e Rendez-vous beim Jackie huelen, wannechgelift.
C : Natierlech ! Ass et just fir ze schneiden oder och fir ze fierwen?
N : Ech muss den Nowuess fierwen an d’Spëtzen e bësse schneiden.
C : An der Rei, wéini geet et Iech?
N : Am beschte muer de Moien.
C : Muer de Moien … Hmm, ech kucken … Nee, do ass schonn alles voll beim Jackie. Ech hätt just nach eppes fräi beim Nadine, um 11 :45.
N : Hmm, nee, dat ass e bësse spéit, an ech géif léiwer wéi ëmmer bei d’Jackie goen. Wéi wier et dann en Donneschdeg?
C : En Donneschdeg ass nach direkt um 8 :30 eppes fräi beim Jackie.
N : Hmm, dat ass fréi ! Mee OK, dann huelen ech dee Rendez-vous.
C : Tipptopp, Madamm Silva. Da bis en Donneschdeg um 8 :30.
N : Jo, Merci ! Bis en Donneschdeg.
Nathalie : Sou, den éischte Rendez-vous ass geholl. Uff ! An elo ruffen ech och direkt beim Kiné un, fir mäi Rendez-vous en Donneschdeg ze verréckelen. Dat gëtt soss e bëssen enk…
P : Praxis Kiné Miersch, gudde Moien.
N : Gudde Moien, hei ass d’Nathalie Silva. Ech ruffen u wéinst engem Rendez-vous, deen ech leider verréckele muss.
P : Wéini ass Äre Rendez-vous ?
N : En Donneschdeg de Moien um 9 :30.
P : Ok, ech kucken … wéini géift dir da gär amplaz kommen ?
N : Eventuell en Donneschdeg Nomëtteg ? Wier do eppes fräi ?
P : Nee, en Donneschdeg ass leider schonn alles voll. E Freideg hätt ech nach eppes.
N : Hmm, e Freideg ass schwiereg, do schaffen ech de ganzen Dag. Soss d’nächst Woch, direkt e Méindeg ?
P : E Méindeg hätt ech nach e Rendez-vous um 14 Auer an um 16 Auer.
N : 14 Auer, dat passt.
P : An der Rei, dann änneren ech de Rendez-vous.
N : Villmools Merci ! Nach e schéinen Dag.
P : Merci gläichfalls.
Nathalie : Uff, dat war jo guer net esou einfach. Mee elo ass alles organiséiert : De Coiffer en Donneschdeg de Moien, an dofir de Kiné e Méindeg Nomëtteg.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Aussprooch "ch" (A1-A2)
5 dec 2024· Poterkëscht vum INLL
Wëllkomm zeréck an der Poterkëscht!
Haut erklären mir d’Aussprooch vum “ch”. Wéini soe mir [χ] a wéini soe mir [ɕ] ?
-
Transkript:
A: Wéi schwätzt een dat Wuert aus?
B: Buch.
A: An dat?
B: Bicher.
A: Mee, firwat “Buch” a firwat “Bicher”?
B: Also: “Bicher” ass de Pluriel vu “Buch”.
An et gëtt och glécklecherweis eng Reegel, wéini mir [χ] a wéini mir [ɕ] soen.
Wa virun dem “ch” en “a”, en “o” oder en “u” ass, da soe mir [χ].
ach, och, uch
So eng Kéier: ach, och, uch
A: ach, och, uch
B: Gutt. Hei si Beispiller: Kach, nach, kachen, aacht, maachen
A: Kach, nach, kachen, aacht, maachen
B: och, Woch, Wochendag, Mëttwoch, Sprooch
A: och, Woch, Wochendag, Mëttwoch, Sprooch
B: Zuch, Buch, Kuch, Luucht, Fluchhafen, brauchen
A: Zuch, Buch, Kuch, Luucht, Fluchhafen, brauchen
B: Gutt!
A: Ok. Gëtt et Exceptiounen?
B: Wéi ganz oft gëtt et och hei Ausnamen. Wéi zum Beispill bei Wierder aus dem
Franséischen: Tâche, Cauchemar, accouchéieren, Grand-Duché

Sou. Wa virun dem “ch” en “i”, en “e” oder en “ä” ass, da soe mir [ɕ].
ich, ech, äch - “äch” mat “a Treema, c, h” oder “ech” mat “e,c,h”
So eng Kéier: ich, ech, äch
A: ich, ech, äch
B: Gutt. Beispiller: Bicher, Zich, richteg, wichteg, sichen, ënnersträichen, Gespréich, Noriichten
A: Bicher, Zich, richteg, wichteg, sichen, ënnersträichen, Gespréich, Noriichten
B: ech, mech, dech, sech, Iech, siechzéng, Aarbecht, mécht, Nuecht, Zeechen
A: ech, mech, dech, sech, Iech, siechzéng, Aarbecht, mécht, Nuecht, Zeechen
B: Kächin, erwächen, Becher, schlecht, Recht
A: Kächin, erwächen, Becher, schlecht, Recht
B: Tipptopp! Opgepasst! Meeschtens, wann hannert dem “ch” en “s” steet, da prononcéiere mir den “ch” als [k].
Beispiller: Dachs, Ochs, nächst, Nächsten, sechs, Béchs, Schongwichs,
Mee och hei ginn et Ausnamen. Mir maachen dat just, wann den “s” en Deel vum Wuert
ass.
Ausname sinn zum Beispill: du kachs, mëttwochs, du brauchs, Besuchszäit, du sichs,
du gläichs, du méchs, asw.
So zum Schluss elo nach eng Kéier d’Reegel:
ach och uch
ich ech äch
A: ach och uch
ich ech äch
B: Perfekt!
A: Cool Merci fir d’Explikatiounen!
B: ‘t ass gär geschitt!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Laat meer zien

Afleveringen

Fuesent zu Lëtzebuerg (A2)

Op eng Hochzäit goen (B1)

Vältesdag (B1)

Vum Wantersport erzielen (B1)

An de Wantersport fueren (B1)

Liichtmëssdag (B1)

En Jobinterview (A2)

Hobby: Badminton (A2)

Am Reesbüro (A2)

Am Sproochecafé (A1)

Interview mam Maisy Gorza (B2)

Hobby: Trail Lafen (A2)

Virsätz fir dat neit Joer (A2)

Vun enger Sylvesterfeier erzielen (A2)

De Wanter a Wanterpneuen (A2)

De Stot an d'Hausregelen (A2)

D'Heavy-Metal-Zeen zu Lëtzebuerg (B2)

E Rendez-vous beim Coiffer a Kiné huelen (A2)

Aussprooch "ch" (A1-A2)