Poterkëscht vum INLL – Podcast

Afleveringen

Vun engem Date erzielen
28 mei· Poterkëscht vum INLL
Wëllkomm zréck an der Poterkëscht!
Haut héiere mir, wéi eng Persoun vun engem Rendez-vous (Date) erzielt (Niveau A2.1).
Vill Spaass beim Nolauschteren!
---
Transkript:
Ech erzielen iech mol eng witzeg Geschicht. Ech war de leschte Freideg op engem Date. Ech hunn den Typ op enger Dating-App kenne geléiert an ech wëll jo keen no sengem Ausgesi beurteelen, mee hien huet guer net esou ausgesi wéi op de Fotoen. Op de Fotoen hat hie schéi laang Hoer, hie war zimmlech sportlech an huet och grouss ausgesinn.
Mir hunn eis um 19:30 bei engem Restaurant getraff a wéi ech hie scho vu Wäitem gesinn hunn, war ech schockéiert! Hien huet guer net esou ausgesi wéi op de Fotoen ... Hien hat eng Glatz a war méi kleng wéi ech! Mee ëmmerhi war e sportlech. Ech war wierklech rosen an enttäuscht, mee ech sot mer, dass e jo vläicht e gudde Charakter huet.
Wéi mer bis am Restaurant souzen a geschwat hunn, ass mer direkt opgefall, dass hien immens sympathesch, intelligent a witzeg ass. Ech hunn deen Owend wierklech vill gelaacht.
No eisem Owend hunn ech decidéiert, deem Ganzen nach eng Chance ze ginn a mir treffen eis d’nächst Woch, fir zesumme Schlittschong fueren ze goen.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Iwwer Vakanz schwätzen
23 mei· Poterkëscht vum INLL
Wëllkomm zréck an der Poterkëscht!
Haut schwätze mir iwwer Vakanz. Fir d'éischt héiere mir en Dialog, wou eng Persoun um Telefon iwwer hir Vakanz schwätzt (Niveau A1). Duerno héiere mir eng Koppel, déi eng Vakanz plangt (Niveau A2.2).
Vill Spaass beim Nolauschteren!
---
Transkript
Dialog 1:
Mamm: Moie Philippe! An, wéi ass et an ärer Vakanz?
Philippe: Super! Haut sinn et 30 Grad an d’Sonn schéngt. Ech gi geschwënn op d’Plage. A wéi ass d’Wieder doheem?
Mamm: Net immens. Hei sinn et just 15 Grad an et reent schonn de ganzen Dag.
Philippe: Dat ass awer schued. Hei um Mier ass d’Wieder perfekt.
Mamm: Flott! Wat maacht dir dann nach esou dës Woch?
Philippe: Den Owend gi mir an e Restaurant typesch Platen aus der Regioun iessen. Muer maachen ech e Surfcours an iwwermuer maache mir en Ausfluch an eng kleng Stad. Mir ginn e Schlass kucken an e bësse shoppen.
Mamm: Dat kléngt flott! Kaf der Bomi e klenge Souvenir a schéck denger Tatta eng Postkaart, da freet si sech.
Philippe: Jo, dat maachen ech. Wat méchs du dann dës Woch nach esou?
Mamm: Haut maachen ech net vill. D’Wieder ass jo schlecht. Den Owend gëtt et och en Donnerwieder. Mee vu muer u gëtt d’Wieder erëm besser. Et ginn 20 Grad a Sonn. Ech schaffe mat dengem Papp am Gaart a mir fuere vläicht op d’Musel spadséieren.
Philippe: Flott! Sou, Mamm, ech muss elo goen, d’Martine waart op mech. Bis geschwënn!
Mamm: Äddi mäi Jong!
Dialog 2:
Lena: Nik, wuer solle mer dëse Summer an d'Vakanz fueren? Nik: Ech hu guer keng Anung... Ech wëll awer gär de Lucky mathuelen, dat heescht, mir fuere mam Auto a bleiwen an Europa, gell?
Lena: Op alle Fall! Ok, dann nenn mer deng Top 3 Destinatiounen! Meng si Schweden, Dänemark an d'Provence.
Nik: Flott! Hmm...op der éischter Plaz ass Holland, op der zweeter Plaz d'Dolomiten an op der drëtter Plaz d'Schwäiz, mee deen Deel ëm Fribourg. Da kënne mer d'Florence besiche goen.
Lena: O, deng Iddie sinn awer och gutt! Wat wéilts de dann an Holland maachen?
Nik: Majo, virun allem kitesurfen. Ech hu viru Kuerzem an engem Video gesinn, datt een net just am Atlantik kitesurfe kann, mee och um IJsselmeer. Dat ass e risege Séi an Holland.
Lena: Cool! Ma dat kléngt jo perfekt! An op engem Séi kann een och nach vill aner Aktivitéite maachen, wéi schwamme goen, Kanu oder Kajak fueren, mat engem Boot fueren, op der Plage liesen, a sou weider.
Nik: Wéi laang solle mer da goen?
Lena: Mat der Hirees wëll ech awer 10 bis 14 Deeg goen. An ech wëll awer och verschidde Stied kucke goen an dir net 2 Woche laang beim Kitesurfen nokucken!
Nik: Natierlech! Soll ech mech dann ëm de Logement këmmeren an du méchs e Plang, wat een alles kucke goe kann?
Lena: Ok!
Nik: Léiwer Camping, Hotel oder en Appartement lounen?
Lena: Mmhh, e Campingcar oder eng Roulotte si mir ze kleng. En Hotel ass ze deier an Hënn sinn a vill Hotellen net erlaabt. Ech si fir en Appartement.
Nik: Gutt, da kucken ech emol, wat ech fannen.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Zijn er afleveringen die ontbreken?

Klik hier om de feed te vernieuwen.
Op e Konveniat goen
21 mei· Poterkëscht vum INLL
Wëllkomm zréck an der Poterkëscht!
Haut héiere mir en Dialog, an deem eng Persoun iwwer de Programm vun hirem Konveniat schwätzt (Niveau A1-A2.1).
Vill Spaass beim Nolauschteren!
---
Transkript:
A: Denk drun, e Samschdeg ass mäin 20-Joer-Konveniat. Da sinn ech net heiheem.
B: A jo! Wéi ass dann de Programm?
A: De Rendez-vous ass um 10.30 bei der Schoul, mee et fänkt um 11 Auer un. Mir maachen eng Visite guidée vun der Schoul an duerno drénke mir e Patt zesummen.
Um 12.30 ass dann en Iesse mat Buffet, mee d’Christine, d’Catherine an ech gi léiwer eng Pizza an eis Liblingspizzeria iessen. Sou wéi fréier!
B: Flott! Wie kënnt dann nach?
A: Aus menger Klass kommen nach d’Stéphanie, d’Charlotte, d’Mandy, den Tom, den David an den Dan. An ech mengen och nach d’Lena, d’Lynn, de Christophe an de Gilles.
B: Topp! Wat maache si dann elo?
A: D’Stéphanie an den Dan si bestuet an hunn e Jong. D’Stéphanie ass Bioproff an den Dan ass Engleschproff. D’Charlotte huet zwee Kanner an ass de Moment am Congé de maternité. Hatt ass och Bioproff. D’Mandy schafft als Model an als Fotografin. Hmm....den Tom ass Affekot...an den David ass de Manager vun engem Betrib. D’Lena...ass Architektin, ... d’Lynn ass Chirurgin, ... de Christophe ... ass Pilot.
B: An de Gilles?
A: Ech weess et net. Hien ass net op de soziale Medien.
B: Aha! Hues de deng Informatiounen all vun do?
A: Ma nee! Mat e puer sinn ech och perséinlech a Kontakt!
B: Kënnt d’Marie och?
A: Nee, hatt wunnt an Australien an huet keng Zäit ze kommen.
B: Schued!
A: Jo...
B: Kommen och Proffe vun der?
A: Ech hoffen, et kommen der e puer. Mir hunn eis zënter 10 Joer net gesinn. Ech freeë mech schonn drop!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Wat hues du gëschter gemaach?
16 mei· Poterkëscht vum INLL
Wëllkomm zréck an der Poterkëscht!
Haut lauschtere mir zwou Persounen no, déi iwwer hiren Dag vu gëschter schwätzen. (Niveau A2.1-A2.2)
Vill Spaass beim Nolauschteren!
---
Tranksript:
Laure: Moien Alex! An, wéi war däin Dag gëschter?
Alex: Salut! Gutt. Ech si géint néng Auer opgestanen an hu mer direkt eng Taass Kaffi gemaach. Du sinn ech eng Véierelstonn mam Hond trëppele gaang an duerno hunn ech nach eng Stonn Yoga gemaach.
Laure: Wow, dat kléngt no engem relaxe Moien. Ech si jalous! Ech hu bis siwen Auer geschlof an hu mech du séier gewäsch an ugedoen. Um hallwer aacht hunn ech de Bus geholl a sinn op d’Aarbecht gefuer.
Alex: Seriö? Du hues e Samschdeg geschafft? Dat ass awer blöd! D’Wieder war jo esou gutt. Hues du dann no der Aarbecht nach eppes Flottes gemaach?
Laure: Jo, ech hu just bis eng Auer geschafft. Eis Epicerie ass samschdes nëmme moies op. Duerno hunn ech mech mat e puer Frënn an der Stad getraff. Mir hunn eppes op enger Terrass gedronk a sinn duerno nach e bëssen an d’Butteker gaangen. Ech hu mir an engem Kleederbuttek eng flott nei Posch kaf. A wat hues du mëttes gemaach?
Alex: Cool! Ech sinn nom Mëttegiessen an de Park gaangen an hunn do e bëssen op enger Bänk gelies. Duerno sinn ech nach séier e puer Saachen an de Supermarché kafe gaangen. Owes hunn ech e puer Frënn fir ze grillen invitéiert. A wéi war däin Owend?
Laure: Flott! Ech hu mir eppes z’iesse bestallt an hu gemittlech e Film op der Tëlee gekuckt. Ech war immens midd a sinn um zéng Auer um Kannapee ageschlof!
Alex: Dat ass mir och scho geschitt! Bass du dann haut de Moien och um Kannapee erwächt?
Laure: Nee, ech sinn an der Nuecht erwächt. D’Tëlee war jo nach un! Ech hu se ausgemaach a si séier a mäi Bett gaangen. Mee so, d’nächst Kéier muss de mech awer och invitéieren, wann s de eng Grillparty méchs!
Alex: Natierlech. D’nächst Woch ass e Feierdag, do hat ech souwisou geplangt, e puer Frënn bei mech heem z’invitéieren. Du kanns gär kommen!
Laure: Cool! Do hunn ech och fräi. Dat klappt. Merci fir d’Invitatioun!
Alex: Gär geschitt. Bis dann!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Gesondheet a Rotschléi
14 mei· Poterkëscht vum INLL
Wëllkomm zréck an der Poterkëscht!
Haut lauschtere mir zwee Dialoger iwwer d'Gesondheet (Niveau A2.2).
Eventuell sinn e puer interessant Rotschléi fir iech dobäi.
Vill Spaass beim Nolauschteren!
---
Transkript
Dialog 1
Luca : Moie Melanie, wéi geet et ?
Melanie : O, net esou gutt. Ech mengen, ech hu mech erëm erkaalt.
Luca : O nee, dat deet mer leed. Waars de scho beim Dokter ?
Melanie : Nee, nach net. Ech hu just e puer Pastille fir den Hals geholl.
Luca : Dat ass jo scho gutt. Drénks de och genuch ?
Melanie : Jo, ech hunn haut schonn zwou Tasen Téi mat Hunneg, Zitroun an Ingwer gedronk. Ech probéieren och ëmmer, zwee Liter Waasser ze drénken.
Luca : Du solls och oppassen, datt s de genuch Vitamminen anhëls. Ëss de genuch Uebst a Geméis ?
Melanie : Ech menge jo. Mee ech war d’lescht Woch an der Vakanz a mir hu vill am Restaurant giess. Dat war dunn net esou einfach.
Luca : A, da kann et och sinn, datt se dir do eppes agefaang hues.
Melanie : Jo, mir sinn och mam Fliger geflunn an d’Klimaanlag huet déi ganzen Zäit kal op mech geblosen …
Luca : Ma da wonnert et mech net, datt s du elo den Hals wéi hues ! Ech huelen ëmmer en décke Pullover mat an de Fliger.
Melanie : Doru muss ech d’nächst Kéier denken. Ech si just genervt, well ech iwwermuer mäin Orall am Italieeneschcours hunn a fit well sinn. Hues du nach e puer Tipps fir mech, wéi ech séier nees gesond ginn ?
Luca : Jo, et ginn e puer Saachen, déi s du déi nächst Deeg maache kanns. Pass op, datt s de genuch schléifs, et sollen op d’mannst 8 Stonne sinn. Du däerfs dech och elo net ze vill stressen. Bleif eventuell en Dag doheem an erhuel dech. A kach eng gutt Zopp, dat hëlleft bal ëmmer.
Melanie : Merci, ech wäert mer deng Rotschléi zu Häerz huelen.
Luca : Gär. Wann et der iwwermuer net besser geet, da géif ech awer bei den Dokter goen.
Dialog 2:
Olivier: Moien! Wéi geet et?
Jessy: O, net immens. Ech sinn an der lescht oft midd an net a Form.
Olivier: Dat deet mer leed. Méchs du Sport? Vläicht géing et der hëllefen, wann s de méi oft eraus an déi frëscht Loft gees.
Jessy: Hmm... vläicht. De Moment maachen ech guer kee Sport. Ech hunn net vill Zäit mat der Aarbecht.
Olivier: Du kéints probéieren, e puer mol d’Woch spadséieren ze goen. Du muss jo net direkt all Dag eng Stonn an de Fitness goen, mee schon zwanzeg Minutten dobaussen an der Mëttespaus kënnen hëllefen.
Jessy: Dat ass eng gutt Iddi. Virun allem déi Deeg, wou ech am Home Office sinn. Do sinn ech e bësse méi flexibel a kéint effektiv en Tour duerch de Park maachen.
Olivier: Gesäis de! Oder du gees moies e Stéck zu Fouss op d’Aarbecht oder du fiers mam Vëlo. Dat geet jo an dëser Joreszäit gutt, well et moies fréi hell gëtt an et net esou kal wéi am Wanter ass.
Jessy: Dat stëmmt. Mee ech hu kee Vëlo ...
Olivier: Et ass bestëmmt eng Veloh-Statioun an dengem Quartier!
Jessy: Dat ka sinn. Ech muss mech emol informéieren. Mee ech mengen, ech muss och eppes u menger Ernärung änneren. An der lescht iessen ech net immens gesond ...
Olivier: Da probéier, einfach e bësse méi Uebst a Geméis z’iessen, a manner Zocker, Fett an Alkohol zou dir ze huelen. Du muss keen extreeme Regimm halen, fir dech gesond z’ernären!
Jessy: Jo, do hues de Recht. Ech mengen, ech muss mir einfach emol méi Zäit fir mech huelen, a vläicht manner schaffen.
Olivier: Dat ka gutt sinn! Wann s de wëlls, gi mer de Weekend bei mech an de Bësch trëppelen. D’Wieder soll gutt ginn!
Jessy: O jo, komm mir maachen dat!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Dagesoflaf an Hobby: Salsa
9 mei· Poterkëscht vum INLL
Wëllkomm zréck an der Poterkëscht!
An der Episod vun haut héiere mir, wat en Doktorand a sengem Alldag mécht. Duerno erzielt d'Mara eppes iwwer säin Hobby, Salsa danzen.
Vill Spaass beim Nolauschteren!
---
Dagesoflaf vun engem Doktorand
Ech stinn normalerweis moies géint sechs Auer op. Ech drénke séier e Kaffi, maache mech fäerdeg a fueren da mam Bus an den INLL. Ech gi véier Mol d’Woch um siwen Auer moies an e Lëtzebuergeschcours. De Cours ass um aacht Auer eriwwer. Dann huelen ech den Tram a fueren op d’Uni. Heiansdo huelen ech och e Vëlo. Moies halen ech oft Virliesungen oder Seminairen. Géint zwielef ginn ech an d’Kantin vun der Uni oder ech brénge mir eppes vun doheem mat. Nomëttes schaffen ech meeschtens an der Bibliothéik. Ech liesen Artikelen a schaffen u mengem Fuerschungsprojet. Heiansdo treffen ech mech och mat mengem Proff, fir iwwer mäi Progrès ze schwätzen an e puer Rotschléi ze kréien. Oft muss ech och Aarbechte vun anere Studente verbesseren. Um sechs Auer fueren ech normalerweis erëm heem. Dann hunn ech endlech e bësse Fräizäit: ech gi spadséieren, maache Sport oder treffe mech mat Frënn. Owes schaffen ech awer och nach e bëssen u menger Thees oder léiere fir mäi Lëtzebuergeschcours. Heiansdo kucken ech duerno nach e Film oder eng Serie, oder ech liesen e Buch. Ech gi spéitstens um zéng Auer schlofen, fir erëm fit fir den nächsten Dag ze sinn.
---
Hobby: Salsa
Ech gi säit zwee Joer an en Danzcours, an zwar, an d’Salsa. Et gëtt verschidden Zorte vu Salsa, wéi zum Beispill déi puerto-ricanesch Salsa an déi kubanesch Salsa. Ech danzen déi kubanesch Salsa.
Eemol d’Woch ginn ech a mäi Cours, an deem ech déi verschidde Schrëtt léieren. Weekends ginn oft verschidden Danzowenter organiséiert, wou ech dann dat, wat ech geléiert hunn, nach e bëssen trainéiere kann.
Wat ech wierklech cool fannen, ass, dass ee keng speziell Kleeder oder Schong brauch, fir kubanesch Salsa ze danzen. Et brauch ee just e bësse Motivatioun a lass geet et.
Am Cours léieren ech net nëmmen danzen, mee ech léieren och dat eent oder dat anert spuenescht Wuert. Virun allem hunn ech interessant Leit kenne geléiert. De Cours gëtt an enger Brasserie organiséiert an do kann ee virum oder nom Cours eppes drénken a mat de Leit schwätzen. Heiansdo iessen ech och eppes an der Brasserie, well et kritt ee ganz lecker kubanesch Spezialitéiten.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Akafsgewunnechten
7 mei· Poterkëscht vum INLL
Wëllkomm zréck an der Poterkëscht!
Haut schwätze mir iwwer Akafsgewunnechten.
Vill Spaass beim Nolauschteren!
---
Transkriptioun:
Iwwer Akafsgewunnechte schwätzen
Moderatorin: Wëllkomm an der Poterkëscht! Haut schwätze mir iwwer Akafsgewunnechten. Mir hunn zwee Invitéen am Studio, d’Sarah an den Thomas.
Sarah: Moien! Merci fir d’Aluedung.
Thomas: Salut! Et freet mech och, hei ze sinn.
Moderatorin: Starte mer direkt mam Theema: Sarah, komm mir fänke mat dir un. Wéi oft gees du akafen a wou keefs du am léifsten an?
Sarah: Also ech ginn ongeféier zweemol d’Woch akafen. Meeschtens ginn ech an e klenge Supermarché a mengem Quartier, well dat praktesch ass an ech do alles fannen, wat ech brauch.
Moderatorin: Ech verstinn. A wat keefs du normalerweis? Ginn et bestëmmt Saachen, déi ëmmer op denger Akafslëscht stinn?
Sarah: Jo, definitiv. Als Jonggesellin kachen ech oft fir mech eleng, also kafen ech vill frëscht Uebst a Geméis, mee och heiansdo preparéiert Platen fir wann et muss séier goen. Ech brauch och ëmmer Kaffi an e puer Séissegkeeten.
Moderatorin: Dat kléngt no enger gudder Balance. Thomas, wéi gesäit et bei dir aus?
Thomas: Ech hunn eng grouss Famill, dofir ass et heiansdo e bësse stresseg. Mee mir hunn eise Rhythmus fonnt a mir ginn eemol d’Woch alleguer zesummen akafen, normalerweis samschdes, well do jiddereen Zäit huet. Mir gi léiwer a grouss Supermarchéen, well mir do alles an enger Kéier kafe kënnen.
Moderatorin: Dat kléngt jo no enger gudder Strategie. Wat steet dann normalerweis bei iech op der Akafslëscht?
Thomas: Mat dräi Kanner doheem brauch ee relativ vill! Mir kafen ëmmer frëscht Uebst a Geméis, Mëllechprodukter, Fleesch an natierlech och Snacke fir d’Kanner. Mir passen och drop op, ëmmer genuch an der Reserv ze hunn, wa mir emol spontan Besuch hunn.
Moderatorin: Dat ass net schlecht! Eng Fro un iech zwee: Firwat ass et iech wichteg, bestëmmt Produiten ze kafen?
Sarah: Ech passe virun allem dorop op, datt d’Saache gesond, mee och einfach ze preparéiere sinn. Dofir kafen ech ëmmer Uebst a Geméis. D’fäerdeg Plate si fir déi Deeg, wou ech owes spéit heemkommen a mir net nach laang e Kapp maache wëll, wat ech kache soll.
Thomas: Bei eis steet d’Famill am Mëttelpunkt. Eis ass et wichteg, datt jidderee sech gesond ernäert. Et mécht eis och vill Spaass, zesummen ze kachen an z’iessen. Do si mir all zesummen a kënnen iwwer eisen Dag schwätzen.
Moderatorin: Schéin. Merci, datt dir e puer Abléck an är Akafsgewunnechte mat eis gedeelt hutt. Mee éier mir äddi soen, hutt dir nach e lescht Wuert oder en Tipp fir eis Nolauschterer?
Sarah: Probéiert, eng Lëscht ze maachen, éier dir akafe gitt. Esou hutt dir en Iwwerbléck a kaaft just dat, wat dir och braucht.
Thomas: An informéiert iech, wat de Moment an der Reklamm ass – esou kënnt dir e puer Euro spueren, virun allem, wann dir grouss Quantitéite kafe musst!
Moderatorin: Merci fir är flott Rotschléi. Bis déi nächst Kéier!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Gesondheet: Dokter an Apdikt
2 mei· Poterkëscht vum INLL
Wëllkomm zréck an der Poterkëscht!
Haut schwätze mir iwwer d'Gesondheet. Fir d'éischt héiere mir e Gespréich beim Dokter an duerno lauschtere mir en Dialog an der Apdikt.
Vill Spaass beim Nolauschteren!
---
Transkriptioun:
Beim Dokter
Rezeptionistin: Gudde Moien! Wéi kann ech Iech hëllefen?
Patientin: Bonjour. Ech hunn haut e Rendez-vous beim Dokter Weber um 10 Auer.
Rezeptionistin: Kënnt Dir mir wgl. Ären Numm an Äre Gebuertsdatum soen?
Patientin: Jo, natierlech. Mäin Numm ass Jessica Klein an ech sinn de 15. Mee 1989 gebuer.
Rezeptionistin: Merci. Huelt Iech wgl. nach en Ament am Wartesall Plaz, den Dokter kënnt geschwënn.
Dokter: Moie Madamm Klein, wéi geet et Iech haut?
Patientin: Moien. Net esou gutt. Ech hunn zanter e puer Deeg Problemer mat menger Nues. Se bäisst déi ganzen Zäit an ech muss oft néitsen. Meng Ae brennen och a mäin Hals ass e bësse rau.
Dokter: Dat kléngt ganz no Heeschnapp. Hat dir déi Problemer schonn eng Kéier an dëser Joreszäit?
Patientin: Jo, d’lescht Joer am Fréijoer hat ech dat och schonn.
Dokter: Dann hutt dir warscheinlech den Heeschnapp. Dat hunn de Moment vill Leit wéinst de Pollen. Ech ginn Iech eng Ordonnance fir Anti-Histamin-Pëllen. Wann dir déi all Dag huelt verbessere sech är Symptomer séier. Ech ginn Iech awer och e Spray fir an d’Nues an Drëpse fir an d’Aen. Kommt awer an engem Mount erëm, da maache mir nach eng Kéier de Bilan.
Patientin: An der Rei. Merci.
Dokter: Gär geschitt. Hei ass Är Ordonnance. Gutt Besserung!
Patientin: Merci, äddi!
An der Apdikt
Apdiktesch: Gudde Mëtteg! Wéi kann ech iech hëllefen?
Client: Gudde Mëtteg. Mäi Jong huet eng zolidd Erkältung an den Dokter huet mir eng Ordonnance fir e puer Medikamenter ginn.
Apdiktesch: Kënnt dir mir d’Ordonnance ginn, wann ech gelift?
Client: Jo, hei ass se.
Apdiktesch: Merci. Ok, ech gesinn ... ee Moment, wgl. Ech ginn d’Medikamenter sichen ... Voilà, hei sinn d’Medikamenter fir äre Jong. Kënnt dir mir wgl. soen, wéi al hien ass?
Client: Jo. Hien huet aacht Joer.
Apdiktesch: Merci. Hei ass fir d‘éischt den Houschtsirop. Deen ass fir de Schläim ze léisen. Äre Jong muss zweemol den Dag en hallwe Läffel nom Iessen huelen. Dann hutt dir hei nach e Spray fir an d’Nues. Dee mécht d’Nues fräi a wierkt géint de Schnapp. Dir musst him deen dräimol den Dag an d’Nues sprayen.
Client: Villmools Merci. Hutt dir nach e puer Rotschléi?
Apdiktesch: Et ass wichteg, datt Äre Jong genuch drénkt, am beschte Waasser oder Téi. Dir sollt och drop oppassen, datt hie vill rascht a genuch schléift, datt säi Kierper sech erhuele kann. Huet hien och Féiwer?
Client: Jo, e bëssen. Hien hat de Moien 38 Grad.
Apdiktesch: Da ginn ech iech nach Pëlle géint d’Féiwer mat. Fänkt awer mat enger klenger Dosis un, fir ze kucken, ob hien d’Medikament verdréit.
Client: Merci, dat maachen ech. Nach e schéinen Dag!
Apdiktesch: Merci gläichfalls!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Transportmëttelen zu Lëtzebuerg
30 apr· Poterkëscht vum INLL
Wëllkomm zréck an der Poterkëscht!
An der Emissioun vun haut schwätze mer iwwer Transportmëttelen zu Lëtzebuerg.
Vill Spaass beim Nolauschteren!
---
Transkriptioun:
Speakerin: Wëllkomm an eiser Emissioun „Op der Rull“. Mir hunn haut dräi Persounen am Studio, fir iwwert d'Transportmëttelen zu Lëtzebuerg ze schwätzen.
Julie, du bass haut mam Tram an de Studio komm. Ass dat richteg?
Julie: Jo. Dat stëmmt. Ech fuere ganz gär mam Tram. Den Tram kënnt all 5 Minutten an ech muss ni am Stau stoen. Dat ass super!
Ayesha: Jo. Dat ass wierklech immens positiv. Ech fueren all Dag mam Zuch schaffen. Ech sinn och frou fir kee Stau ze hunn. Den Zuch kënnt awer leider oft ze spéit. A moies si ganz vill Leit am Zuch. Dat ass net esou flott.
Speakerin: Thierry, wéi fiers du dann op d'Aarbecht?
Thierry: Ech wunnen zu Réimech. Do hu mir keen Zuch an d'Busverbindunge sinn och net immens. Ech kréie just all hallef Stonn e Bus fir an d'Stad.
Speakerin: Dat heescht... Du fiers da meeschtens mam Auto.
Thierry: Jo. Dat ass definitiv méi praktesch fir mech.
Speakerin: Hues du dann oft Stau?
Thierry: Jo. Owes ass ëmmer ganz vill Trafick. Heiansdo schaffen ech just bis 15:30 Auer. Da kommen ech ouni vill Stau heem.
Ayesha: All Dag am Verkéier stoen ass schrecklech! Am Zuch sëtzt ee gutt an ech si frou, dass ech all Moien e Buch ka liesen.
Julie: Dat ass flott. Meng Distanze mam Tram sinn ëmmer kuerz an ech kann net ëmmer sëtzen, wa vill Leit matfueren. Ech hunn awer all Dag meng Kopfhörer un an ech lauschtere Musek oder en neie flotte Podcast.
Speakerin: Thierry, wéi ass et da mam Parking? Du fiers jo mam Auto schaffen.
Thierry: Dat ass kee Problem. Ech fannen ëmmer eng Parkplaz um Glacis. Just am Summer, wann d'Schueberfouer ass, ass et komplizéiert mam Parking. Da fueren ech meeschtens mam Bus op d'Aarbecht. Dann ass jo och Grouss Vakanz an et ass vill manner Trafick. Da brauch de Bus och net esou laang bis an d'Stad.
Julie: Am Summer fueren ech och heiansdo mam Vëlo schaffen. Ech maachen dat gär.
Speakerin: Villmools Merci dir dräi fir är Temoignagen! Ech mierken, dass jidderee vun iech vum ëffentlechen Transport profitéiert. Mir hu wierklech Chance, dass den ëffentlechen Transport hei zu Lëtzebuerg zënter Mäerz 2020 gratis ass.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Aussprooch: De Buschtaf ,,r’’
25 apr· Poterkëscht vum INLL
Wëllkomm zréck an der Poterkëscht!
Haut hu mir e speziellen Episod fir iech: mir trainéieren zesummen d’Aussprooch vum Buschtaf ,,r’’.
- - -
Transkript:
Mir prononcéieren de [x] an de [ʀ] allen zwee op der selwechter Plaz, uewen, hannen am Mond.
Sot eng Kéier „Buch“.
An elo [x].
Do wou dir de [x] produzéiert, produzéiert dir och de [ʀ].
[x]_[ʀ]_[x]_[ʀ] : Sot eng Kéier [x]_[ʀ]_[x]_[ʀ]
An elo: [ʀ] [ʀ] [ʀ]
Elo héiere mir Beispiller an dir widderhuelt:
-rout, rosa, richteg, roueg, Rous, ronn, reesen, Rees, ruffen, Reen.
-Arabesch, brong, Brout, Crème, dräi, drësseg, eraus, eran, erof, erop, froen, Fro, frou, grouss, Grad.-Iran, Irland, krank, Orange, Organ, prett, Problem.
-Sri-Lanka, Tram, Trick, urban, uruffen, vreck, vrun, Wrack, zréck.
-De Robert an de Rafael reparéiere rout Rakéiten.
Ech widderhuelen: De Robert an de Rafael reparéiere rout Rakéiten.
Schwätzt mat mir zesummen: De Robert an de Rafael reparéiere rout Rakéiten.
-Mäi Brudder bréngt d'Brout an de Brot op Bréissel.
Ech widderhuelen: Mäi Brudder bréngt d'Brout an de Brot op Bréissel.
Schwätzt mat mir zesummen: Mäi Brudder bréngt d'Brout an de Brot op Bréissel.
-Dann nach eng Zuel: dräidausendräihonnertdräiandrësseg. Dräidausenddräihonnertdräiandrësseg.Schwätzt mat mir zesummen: dräidausenddräihonnertdräiandrësseg.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
De Stot maachen
23 apr· Poterkëscht vum INLL
Wëllkomm zréck an der Poterkëscht!
Haut schwätze mir iwwer d’Aktivitéiten am Stot.
Vill Spaass beim Nolauschteren!
- - -
Transkript:
Moderatorin: Wëllkomm an der Poterkëscht. Haut hu mir rëm en interessant Theema fir iech: de Stot ! Ech begréissen d’Lisa an de Max am Studio. Si wäerten iech elo iwwer hir Erfarungen am Stot erzielen. Kënnt dir iech kuerz virstellen?
Lisa: Moien, ech sinn d’Lisa an ech schaffen als Graphikdesignerin. Ech wunnen eleng an engem Studio a këmmere mech och eleng ëm de Stot.
Max: Salut, ech sinn de Max. Ech si Student a wunnen de Moment an enger WG mat dräi anere Studenten. Mir deelen eis d’Aufgaben am Stot.
Moderatorin: Dat kléngt spannend! Lisa, wëlls du eis e bëssen erzielen, wéi en typeschen Dag bei dir am Stot ausgesäit ?
Lisa: Kloer ! Moies maachen ech fir d’éischt mäi Bett. Dann drénken ech Kaffi a raumen duerno alles an d’Spullmaschinn. Da fueren ech schaffen. No der Aarbecht kachen ech a botzen duerno d’Kichen. Ech loossen d’Spullmaschinn all zwee Deeg lafen, de Weekends heiansdo méi oft. Ech si wierklech frou, eng Spullmaschinn ze hunn, well ech kachen a bake gär an oft!
Moderatorin: Jo, eng Spullmaschinn ass wierklech praktesch. Max, wéi ass et bei dir an der WG?
Max: Mir hu leider keng Spullmaschinn, mee mir si jo zu puer, fir d’Spull ze maachen. Generell gëtt et bei eis e Plang fir d’Aufgaben am Stot. Jidderee vun eis huet all Woch eng aner Aufgab. Dës Woch ass et zum Beispill u mir, fir d’Dreckskëscht eidel ze maachen a mech ëm de Recycling ze këmmeren. Déi aner dräi Rolle sinn d’Kommissioun maache goen, d’Kiche propper halen an d’Buedzëmmer an d’separat Toilette botzen.
Moderatorin: Dat heescht, jidderee botzt seng eege Kummer?
Max: Jo! Strecken, wäschen a kache maache mir och separat, mee een Owend pro Woch kache mir all zesummen eppes a lueden och Frënn an.
Moderatorin: Cool! Dat kléngt no enger gudder Organisatioun. Lisa, wat ass da fir dech déi gréisst Erausfuerderung am Stot?
Lisa: Hmm, et ass heiansdo schwiereg, alles eleng ze maachen. Besonnesch wann ech vill Aarbecht hunn, bleift wéineg Zäit fir de Stot iwwreg. Mee meng Wunneng ass jo net grouss. Wat nervt, ass datt ech keng Wäschmaschinn hunn. Ech muss eemol d’Woch mat all menge Saachen an eng Wäscherei goen. Do stinn néng Wäschmaschinnen an et kascht siwen Euro pro Wäsch. Dat nervt.
Moderatorin: Jo, dat ass ëmständlech. Max, nach eng lescht Fro un dech: Kënnt et och vir, datt et Konflikter bei iech an der WG ginn, wann et ëm de Stot geet ?
Max: Jo, natierlech. Mee mir hunn eng WhatsApp-Grupp, an där mir iwwer all Problemer schwätze kënnen. Heiansdo muss een effektiv emol e Matbewunner un de Roulement erënneren, virun allem, wann et ëm d’Botze geet ! (laacht)
Moderatorin: Merci Lisa a Max, datt dir iech Zäit geholl huet, mat eis iwwer är Erfarungen am Stot ze schwätzen.
Max a Lisa: Gär geschitt!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Den Aarbechtsalldag
18 apr· Poterkëscht vum INLL
Wëllkomm zréck an der Poterkëscht!
Haut lauschtere mer zwou Persounen no, déi eis eppes iwwer hiren Dagesoflaf op der Aarbecht erzielen.
Vill Spaass beim Nolauschteren!
---
Transkript:
Dem Emma säin Dag
D’Emma erwächt moies géint siwen Auer. Hatt steet op, deet sech un an drénkt Kaffi. Normalerweis drénkt hatt eng Taass Téi an ësst e Jughurt mat Uebst a Müsli. Dobäi scrollt hatt meeschtens um Handy a liest d’Neiegkeeten.
Duerno geet hatt zu Fouss op den Tram a fiert op d’Aarbecht. Hatt brauch ongeféier zwanzeg Minutten. Säi Büro ass um Kierchbierg. Hatt schafft bis mëttes, mee hatt mécht all Dag géint zéng Auer eng Kaffispaus. An der Mëttesstonn geet hatt meeschtens mat Aarbechtskolleegen an d’Kantin iessen. Nomëttes huet hat oft Reunioune mat Clienten oder hatt schafft u Rapporten.
No der Aarbecht geet hatt entweeder an de Lëtzebuergeschcours oder hatt trëfft sech mat Frënn. Zesumme gi si oft an d’Stad eppes drénken oder an de Park spadséieren, wann d’Wieder gutt ass. Eemol d’Woch geet hatt mat enger Frëndin an e Yogacours.
Hatt ass meeschtens géint siwen Auer erëm doheem a preparéiert dann d’Owesiessen. Heiansdo bestellt hatt sech och eppes, zum Beispill Sushi oder eng Pizza. Hatt läit owes gär nach e bëssen um Kannapee fir z’entspanen a kuckt eng Serie op der Tëlee oder telefonéiert mat senger Famill.
Géint zéng Auer geet hatt an d’Buedzëmmer. Hatt hëlt nach schnell eng Dusch a botzt seng Zänn, deet de Pyjama un a geet spéitstens um eelef Auer schlofen.
Dialog: den Aarbechtsalldag
Anna: Hey... Wat ass lass? Geet et dir gutt?
Tom: Jo. Mee muer ass Méindeg an ech muss erëm schaffe goen.
Anna: Erziel mir emol vun denger Aarbecht. Wéi ass de Programm vun dengem Dag?
Tom: Muer de Moie rabbelt mäi Wecker um 6:30 Auer. Dann drénken ech eng Taass Kaffi an iessen zwou Schmieren.
Um 7:20 Auer huelen ech de Bus an um 7:50 Auer sinn ech um Büro. Als éischt maachen ech mäi Computer un an da liesen a beäntweren ech meng E-Mailen.
Vun 9:00 bis 10:00 Auer telefonéieren ech mat Clienten. Duerno maachen ech ëmmer eng kleng Paus an drénken eng Taass Kaffi virun der Dier. Ech si gär 10 Minutten dobaussen an der frëscher Loft.
Anna: A wat méchs du no der Paus?
Tom: Da ginn ech bei mäi Chef an de Büro e puer Dossiere sichen. Dann hunn ech genuch Aarbecht bis 12:00 Auer. An der Mëttesstonn ginn ech meeschtens mat e puer Aarbechtskolleegen iessen. Méindes iesse mir normalerweis an der Kantin.
Um 13:00 Auer hunn ech dann eng Reunioun mat mengem Chef a mir schwätzen iwwert d'Dossiere vu moies. D'Reunioun dauert ongeféier eng Stonn. Duerno schreiwen ech ëmmer direkt e klenge Rapport. Wann ech mam Rapport fäerdeg
sinn, schécken ech e mengem Assistent. Dee mécht da Kopië vum Rapport a klasséiert alles. An där Zäit ruffen ech nach e puer Clienten un an ech huele mir Notten, fir d'Reunioun en Dënschdeg ze preparéieren.
Anna: Du hues wierklech vill Aarbecht.
Tom: Jo. An ech sëtze vill. Dat hunn ech net gär.
Anna: Wëlls du da muer no der Aarbecht lafe goen?
Tom: Mat dir?
Anna: Majo.
Tom: Dat ass eng gutt Iddi! An duerno gi mer eppes Guddes iessen an e Patt drénken.
Anna: Solle mir nom Iessen nach an de Kino goen?
Tom: Ganz gär. Merci Anna! Elo sinn ech motivéiert fir muer schaffen ze goen.
Anna: Dat ass gutt! Da sinn ech frou!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Hobbyen: Lafen a Schwammen
16 apr· Poterkëscht vum INLL
Wëllkomm zréck an der Poterkëscht!
Haut lauschtere mer zwou Persounen no, déi eis eppes iwwer hir Hobbyen erzielen.
Vill Spaass beim Nolauschteren!
---
Transkript:
Lafen
Mäin Hobby ass lafen. Ech hunn et immens gär, dobaussen an der frëscher Loft ze trainéieren. Dräimol d’Woch doen ech moies meng Lafschong un a ginn eng hallef bis eng Stonn an de Park oder an de Bësch lafen.
Ech lafen net immens séier, mee dat ass net schlëmm. Esou kann ech ofschalten an e bëssen Zäit fir mech hunn. Beim Lafe kann ech gutt nodenken an nei Energie tanken. Natierlech hëlleft och déi richteg Musek!
Heiansdo maachen ech och en Tour zesumme mat Frënn. Dat ass flott, well mir eis géigesäiteg motivéieren. E puer vu menge Kolleege sinn awer vill méi schnell wéi ech, mee dat ass kee Problem. Jiddweree leeft a sengem Tempo.
Mäin Zil ass et, reegelméisseg ze lafe fir fit a gesond ze bleiwen. Mee ech wëll och meng Ausdauer verbesseren. De Moment lafen ech ongeféier fënnef bis aacht Kilometer, mee ech géif gär zéng Kilometer um Stéck packen. Dofir trainéieren ech de Moment mat engem Trainingsplang an hoffen, esou meng Distanzen ze verbesseren.
En anert grousst Zil ass et, eng Kéier bei engem Hallefmarathon matzemaachen. Zu Lëtzebuerg ass all Summer e grousse Marathon an ech wier immens houfereg, do eng Kéier dobäi ze sinn. Jo, et ass eng grouss Erausfuerderung, mee ech gleewen drun, datt ech dat packen. Vläicht sinn ech jo esouguer schonn d’nächst Joer prett!
Schwammen
Moien! Ech sinn d'Alma an ech hunn eng chronesch Krankheet.
Duerfir ginn ech eemol d'Woch, vu 17.00 bis 19.00 mat enger Lëtzebuerger Associatioun an d'Piscine.
Um 16.30 fueren ech doheem fort a kommen um 16.50 un.
Ech ginn an de Vestiaire, ech doe meng Kleeder aus an ech doe mäi Maillot a meng Schwammkap un.
Duerno ginn ech an d'Dusch.
Vu 17.00 bis 18.00 maache mir Aquagymnastik. Mir trëppelen duerch d'Waasser, mir lafen, mir sprangen, mir spille mam Ball, a sou weider...
Géint 18.00 kréie mir nach d'Geleeënheet, eng hallef Stonn ze schwammen oder am waarme Waasser z'entspanen.
Ech schwammen immens gär! Ech schwamme Brasse, Kraul, um Réck an esouguer e bësse Papillon. Duerno sinn ech immens midd, awer och glécklech, well ech weess, datt ech eppes Guddes fir mäi Kierper gemaach hunn.
Um 18.30 musse mir aus der Piscine eraus.
Ech dusche mech, ech dréchne mech of, ech di mech un an ech föne meng Hoer.
Géint 19.00 fueren ech erëm heem.
Ech sinn immens dankbar, datt ech dat eemol d'Woch maache kann!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
E Rendez-vous ausmaachen
9 apr· Poterkëscht vum INLL
Wëllkomm zréck an der Poterkëscht!
Haut lauschtere mir, wéi zwou Persounen e Rendez-vous ausmaachen.
Vill Spaass beim Nolauschteren!
---
Transkript:
Fra: O nee... D'nächst Woch en Donneschdeg, hu mir den Oralexamen am Lëtzebuergeschen.
Mann: Jo. Ech si schonn e bëssen nervös.
Fra: Solle mir zwee zesumme léieren?
Mann: Dat ass eng gutt Iddi. Da kënne mir eis gutt preparéieren.
Fra: Hues du e Méindeg den Owend Zäit?
Mann: E Méindeg? Um wéi vill Auer?
Fra: Géint 19:30 Auer.
Mann: Dat geet leider net. Meng Fra huet dann e Yogacours. Ech muss dann doheem sinn, fir d'Kanner an d'Bett ze leeën.
Fra: Hues du en Dënschdeg no der Aarbecht Zäit?
Mann: Jo. Dat geet. Ech fänken da moies um 7:00 Auer mat schaffen un. Da kann ech schonn um 16:00 Auer mat schaffen ophalen.
Fra: Perfekt. Wou treffe mir eis?
Mann: Solle mir an „d'Märeler-Stuff“ goen? Dat ass en neie flotte Café am Park, zu Märel.
Fra: Et ass bestëmmt flott do. Mee, ech mengen et ass net roueg am Café.
Mann: Dat ass richteg. Solle mir an d'Mediathéik vum INLL goen?
Fra: Jo, firwat net? Se ass bis 19:00 Auer op.
Mann: Tipptopp. Treffe mir eis direkt um 16:15 Auer an der Mediathéik?
Fra: Schaffs du net um Boulevard Royal?
Mann: Dach.
Fra: Ech och. Da komm mir huelen den Tram zesummen, um 16:05 Auer.
Mann: Ganz gär.
Fra: Super. Bis en Dënschdeg dann! A vergiess däi Buch net!
Mann: Ech probéieren. Allez... Äddi! Bis en Dënschdeg.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
E Rezept: Kniddelen
2 apr· Poterkëscht vum INLL
Wëllkomm zréck an der Poterkëscht!
Haut hu mir eng speziell Episod fir iech. Mir héieren en traditionellt lëtzebuergescht Rezept: Kniddelen!
Vill Spaass beim Nolauschteren (a beim Kachen)!
---
Transkript:
Yuuka: O nee... Eise Frigo ass jo nach ëmmer eidel! Ben, du wollts dach haut akafe goen.
Ben: Ech gi muer de Moien an de Supermarché. Ech hat haut ze vill Aarbecht an ech hat guer keng Zäit.
Yuuka: Wat iesse mir dann elo?
Ben: Da waart emol... Ech kucken. A... Ech hunn eng Iddi. Mir maache Kniddelen.
Yuuka: Kniddelen? Wat ass dat dann?
Ben: Du kachs mir oft japanesch Spezialitéiten. Haut preparéieren ech dir emol en typesch lëtzebuergesche Plat.
Yuuka: Ganz gär. Wéi ass dann d'Rezept?
Ben: Dat hei ass d'Rezept vu menger Mamm. Mir brauchen: 350 Gramm Miel, 200 Milliliter Mëllech, 3 Eeër an e bësse Salz.
Yuuka: Okay. An elo?
Ben: Ech stelle mol en Dëppe Waasser op d'Kachplack an da brénge mir d'Waasser zum Kachen. An där Zäit, kënne mir scho mam Deeg ufänken. Ech huelen eng Schossel maachen d'Miel, d'Eeër, d'Mëllech an d'Salz dran an da mixen ech alles.
Yuuka: Den Deeg gesäit jo elo scho gutt aus an d'Waasser kacht.
Ben: Jo. Elo huele mir zwee kleng Läffelen a mir formen kleng Bullen aus dem Deeg. Da maache mir d'Bullen Deeg an d'Waasser. Dat maache mir soulaang bis keen Deeg méi am Dëppen ass.
Yuuka: Wéi mierke mir wann d'Kniddele prett sinn?
Ben: Wann d'Kniddelen uewe schwammen, si se fäerdeg. Dat dauert tëschent 8 an 10 Minutten. Duerno leeë mir se op en Teller a mir loosse se kal ginn. Wa se da kal sinn, brode mir se an der Pan bis se ganz e bësse brong sinn.
Yuuka: Ass dat alles?
Ben: Elo kann een nach Speck an der Pan broden an e bësse Ram dobäi maachen. Et kann een och Kéis drop maachen. Dat hunn ech gär.
Yuuka: Mir hunn awer kee Speck, keng Ram an och kee Kéis.
Ben: Dat ass net schlëmm. Mir iesse se einfach mat Äppelkompott.
Yuuka: An dat ass gutt?
Ben: Hei... Schmaach emol.
Yuuka: O jo. Dat ass gutt! Merci!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Fréijoer a Liblingsplaz zu Lëtzebuerg
28 mrt· Poterkëscht vum INLL
Wëllkomm zréck an der Poterkëscht!
Haut schwätze mir iwwer d’Fréijoer zu Lëtzebuerg. Duerno lauschtere mir dem Marielle no, wat eis eppes iwwer seng Liblingsplaz zu Lëtzebuerg erzielt.
Vill Spaass beim Nolauschteren!
---
Transkript:
D’Fréijoer
Haut schwätze mir e bëssen iwwert d’Fréijoer zu Lëtzebuerg. Mir schwätzen iwwert d’Wieder, mee och iwwert verschidden Aktivitéiten, déi een zu Lëtzebuerg am Fréijoer maache kann. Vläicht inspiréiert Iech dat, déi eng oder déi aner Aktivitéit auszeprobéieren.
Am Fréijoer ass et normalerweis net méi esou kal an et reent och manner wéi am Hierscht. Am Fréijoer sinn et ëm déi 15 Grad an et kann een och vill Aktivitéiten dobausse maachen. Wann een an der Stad bleiwe wëll, da kann ee sech am Bicherschaf e Buch ausléinen an an e Park liese goen. An der Stad gëtt et e puer ganz schéi Parken, wou een och picknicke goe kann, wéi zum Beispill den Neumans Park, de Märeler Park oder d’Kinnekswiss. Et kann een awer och spadséiere goen an déi verschidde Weeër, wéi zum Beispill de Wenzelstour an der Stad entdecken. Bei dësen Trëppeltier gesäit ee vill wichteg Deeler vun der Stad, wéi zum Beispill d’Kasematten, al Deeler vun der Festung, de Gronn asw.
Wann ee raus aus der Stad wëll, da kann een och an der Mëllerdall wandere goen. Do gëtt et vill verschidde Wanderweeër a se sinn och all immens gutt gekennzeechent, sou dass ee sech net verléiere kann. Oder, wann ee gär Mountainbike fiert, da kann een am Minett déi verschidde Weeër vum RedRock Mountainbike Trail ausprobéieren. Sou kann een de Süde vu Lëtzebuerg entdecken.
Meng Liblingsplaz zu Lëtzebuerg
Meng Liblingsplaz zu Lëtzebuerg ass op der Musel, zu Réimech.
Ech fueren op d’mannst ee Mol de Mount mat mengem Mann op Réimech, fir do laanscht d’Musel spadséieren ze goen.
Duerno gi mir normalerweis eng Taass Kaffi an e Café op d’Esplanade drénken oder, wann d’Wieder gutt ass, op d’Terrass vun enger Kellerei a schmaachen hire Wäin.
Wa mir Besuch vu Frënn oder vun der Famill aus eisen Heemechtslänner Polen an Argentinie kréien, da fuere mir ëmmer mat hinne mam Schëff „MS Princesse Marie-Astrid“ op der Musel hin an hier. D’Vue op d’Wäibierger ass fir mech dat Schéinst!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Meng Famill
26 mrt· Poterkëscht vum INLL
Wëllkomm zréck an der Poterkëscht!
Haut schwätze mir iwwer Famill (Niveau A1).
Vill Spaass beim Nolauschteren!
---
Transkript:
Luc: Gudde Moien, mäin Numm ass Luc an ech stellen iech haut meng Famill vir. Ech sinn zënter 8 Joer bestuet a meng Fra heescht Sandrine. D'Sandrine huet 37 Joer an hatt huet de 27. Abrëll Gebuertsdag. Zesummen hu mir zwee Kanner, de Vinz an d'Lorie. Meng Elteren heesche Laurence a Jemp. Si sinn 72 Joer al. Mäi Papp ass am Fréijoer gebuer a meng Mamm am Hierscht.
Mäi Bopa Pierre ass leider schonn 2006 gestuerwen. Meng Boma Germaine lieft awer nach a feiert dëst Joer hir 93 Joer.
Ech hunn och eng Schwëster. D'Lisa ass den 23. Dezember 1988 gebuer. Hatt huet dräi Kanner. Zwee Meedercher an ee Jong. Meng Niessen heeschen Emma a Charlotte. Mäin Neveu heescht Finn.
Lisa: Jo, d'Emma ass de 14. Mäerz 2014 gebuer. D'Charlotte ass den 3. Mee 2017 op d'Welt komm an de Finn huet eréischt 4 Joer. Hien ass den 29. Februar 2020 gebuer. Meng Kanner spille ganz gär mat hirem Cousin Vinz an hirer Cousine Lorie.
Vinz: Moien, ech heesche Vinz. Ech hu 5 Joer. Am Oktober kréien ech scho 6 Joer. Meng Schwëster ass nach kleng. Hatt heescht Lorie an hatt huet eréischt 2 Joer.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Iesspreferenzen an e Kommentar am Restaurant
21 mrt· Poterkëscht vum INLL
Wëllkomm zréck an der Poterkëscht!
Haut schwätze mir iwwer Iessen. Fir d'éischt lauschtere mir zwou Persounen no, déi iwwer hir Iessgewunnechte schwätzen (Niveau A1).
Duerno gi mir an de Restaurant a mir lauschteren zwou Persounen no, déi hiert Iesse kommentéieren (Niveau A2.1).
Vill Spaass beim Nolauschteren!
---
Transkript:
Iwwer Iessgewunnechte schwätzen
Max : So Anna, du bass jo Veganerin, oder?
Anna : Jo. Ech ernäre mech zanter dräi Joer vegan.
Max : Wow ! Dann ëss du bestëmmt vill Uebst a Geméis.
Anna : Jo. Ech iessen immens gär Geméis, zum Beispill Brokkoli a Spinat. Just Auberginnen a Champignonen iessen ech guer net gär. An du, ëss du och gär Geméis?
Max : Nee, ech iesse guer net gär Geméis ! Ech iesse léiwer Fleesch, besonnesch Poulet a Rëndfleesch. Mee ech iesse kee Schwéngefleesch. Ëss du dann och kee Fësch?
Anna : Nee. Ech iesse weeder Fleesch nach Fësch.
Max : Ëss du da Kéis oder Jughurt?
Anna : Nee. Ech iesse keng Mëllechprodukter an och keng Eeër.
Max : Ass dat da gesond?
Anna : Jo, ech iesse jo vill aner Saache mat Proteinnen, zum Beispill Lënsen, Bounen an Tofu. An ech iesse ganz gär Uebst, virun allem Banannen, Äppel an Äerdbier.
Max : O, ech si leider allergesch op vill Uebst. Ech iessen dofir keng Äerdbier, keng Orangen a keng Kiwien.
Anna : Dat ass awer schued. Hues du e Liblingsiessen?
Max : Jo ech iesse ganz gär schaarf Saachen, zum Beispill Curry. Ëss du och gär schaarf?
Anna : Jo, mee net ze schaarf. Ze vill Chilli hunn ech net gär.
Max : Da kache mir eng Kéier zesummen e vegane Curry! Dat geet och ganz einfach mat Lënsen oder Tofu.
Anna : Dat kléngt super! Dat maache mer!
Am Restaurant : D’Iesse kommentéieren
Client 1: Wat sinn ech frou, datt mir haut den Owend net doheem kachen. An de Restaurant soll immens gutt sinn. En huet ganz gutt Rezensiounen.
Client 2: Ech hoffen! Ech si schonn hongereg. Komm ,mir drénken eisen Aperitif. Prost!
Client 1: Mmh, däi Bifdeck gesäit awer gutt aus.
Client 2: Jo, ech hoffen e schmaacht och gutt an d’Fleesch ass zaart. Däi Curry richt awer och gutt. Gudden Appetit!
Client 1: Gudden Appetit!
Client 1: Entschëllegt, ech hu kee Läffel, fir mäi Curry z’iessen. Ech hu just eng Forschett an e Messer.
Client 2: An ech bräicht nach eng Zerwéit, wgl.! Meng ass leider knaschteg.
Client 2: An? Schmaacht et?
Client 1: Net extra. Ech mengen, a mengem Plat ass Knuewelek dran, an ech hat extra ouni gefrot, ech si jo allergesch! An et ass vill ze schaarf! Pff … A wéi fënns du däin Iessen?
Client 2: O, alt esou. De Bifdeck ass immens dréchen an zéi. D’Zooss ass och zimmlech fad, an d’Fritte sinn immens gesalzt.
Client 2: Wëlls de nach en Dessert?
Client 1: Nee, hei bestellen ech näischt méi ausser d’Rechnung! Ech ginn och dës Kéier keen Drénkgeld, de Service war ze lues. Eng Stonn waarden, just fir e Curry an e Bifdeck!
Client 2: Ech sinn averstan. Entschëllegt, d’Rechnung wgl.!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Pläng a Projete fir d'Zukunft
19 mrt· Poterkëscht vum INLL
Wëllkomm zréck an der Poterkëscht!
Haut lauschtere mir zwou Persounen no, déi iwwer hir berufflech a privat Pläng fir d'Zukunft schwätzen.
Vill Spaass beim Nolauschteren!
---
Transkript:
Kelly: Moie Gilles! An, wéi leeft et mat dengem Engleschcours?
Gilles: Salut! Ma gutt, merci! Ech gi jo dräimol d’Woch an de Cours an hu scho vill Saache geléiert. Et ass awer zimmlech intensiv an ech muss vill doheem léieren. Mee ech wëll onbedéngt an engem Joer fléissend Englesch schwätzen, fir meng Aarbechtskolleege besser ze verstoen.
Kelly: Jo, eng Sprooch léieren ass net esou einfach. Du hues jo awer e konkreet Zil an dat ass gutt fir d’Motivatioun. Et ass bestëmmt och e Virdeel fir deng berufflech Karriär. Vläicht wëlls de jo eemol am Ausland schaffen! Ech wëll mech elo och e bësse weiderbilde fir meng Aarbecht.
Gilles: Dat ass ëmmer eng gutt Iddi! A wat fir eng Richtung dann?
Kelly: Ech schaffen elo schonn dräi Joer a menger Entreprise an ech hätt gär méi Responsabilitéit. Dofir muss ech awer nach e puer Saache léieren. Ech hu virun e puer Deeg um Internet eng interessant Formatioun am Beräich Project Management gesinn. Déi gesäit interessant aus.
Gilles: Ma da mell dech do un! Do léiers de bestëmmt vill Saachen.
Kelly: Jo, dat sécher. Ech muss just kucken, ob ech genuch Zäit dofir hunn. Ech hunn nämlech och nach e perséinlecht Zil - mäi Frënd an ech wëllen eis Enn des Jores bestueden.
Gilles: Wow, Gléckwonsch! Da sidd dir bestëmmt schonn déck amgaang ze plangen.
Kelly: Jo, et gëtt immens vill z’organiséieren, well dem Giuseppe seng Famill jo an Italie wunnt.
Gilles: Dat gleewen ech. Et ass ni einfach, eng Hochzäit z’organiséieren, mee et gëtt bestëmmt e wonnerbaren Dag.
Kelly: Dat sinn ech mer sécher. Du wäerts deemnächst natierlech och eng Invitatioun geschéckt kréien!
Gilles: O, da sinn ech awer elo gespaant!
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Hobbyen: Sangen a Fitness
14 mrt· Poterkëscht vum INLL
Wëllkomm zréck an der Poterkëscht!
Haut lauschtere mir zwou Persounen no, déi eppes iwwer hir Fräizäitaktivitéiten erzielen.
Vill Spaass beim Nolauschteren!
---
Transkript:
Dialog Hobby: Chouer
Alex: Zoé, du bass dach an engem Chouer. Ech wëll nees méi sangen a sichen hei zu Lëtzebuerg e Chouer. Ech hu schonn Erfarung, well ech zu Budapest siwe Joer an enger Chorale war.
Zoé: Jo, ech sinn an der Chorale Florale zu Ierpeldeng. Ech sinn immens frou do!
Mir hu Sängerinnen a Sänger vun all Alter, vun ongeféier 16 Joer bis ca. Enn 70. Et ass kee professionelle Chouer, mee jiddereen ass immens engagéiert.
Alex: Flott! A wat sangt dir do?
Zoé: Vun allem. Mir sange gär klassesch Chouermusek, mee heiansdo och méi modern Stécker.
Alex: Ass den Dirigent léif?
Zoé: Mir hunn eng Dirigentin! D’Emilie ass immens léif a kompetent! Hatt ass Gesangsproff am Conservatoire an der Stad.
Alex: Cool! Wéini prouft dir?
Zoé: Donneschdes owes vun 19.30 bis 21.30 an engem Sall an der Musekschoul zu Ierpeldeng. Zwee Mol d’Joer maache mir och Proufweekender a bereeden eis op eis Concerte vir.
Alex: Dat kléngt wierklech flott! Kann ech schonn den nächsten Donneschdeg laanschtkommen?
Zoé: Gär! Et feelen eis nach Männerstëmmen...!
Dialog Hobby: Fitness
Speakerin: Wëllkomm an der Poterkëscht. Mir hunn haut de Fränk virum Mikro.
Fränk: Moien. Merci fir d'Invitatioun!
Speakerin: Méchs du gär Sport?
Fränk: Jo! Ganz gär. Zënter zwee Joer, maachen ech reegelméisseg Fitness.
Speakerin: Flott. Gees du zesumme mat anere Leit a Coursen?
Fränk: Nee. Ech trainéieren eleng mat engem Trainer. Ech maache gär Sport an enger Ekipp, mee Fitness maachen ech gär eleng. Den Trainer ka sech da just op mech konzentréieren an den Training adaptéieren.
Speakerin: Ech verstinn. Wéi oft gees du dann?
Fränk: Ech hu leider net vill Zäit. Ech ka just zwee Mol d'Woch goen.
Speakerin: Trainéiers du moies oder owes?
Fränk: Méindes fänkt mäin Training um 14:30 Auer nomëttes un. An donneschdes fänken ech um 9:00 Auer moies un.
Speakerin: Wéi laang dauert dann eng Seance?
Fränk: Mäin Training ass ganz intensiv. No 45 Minutten ass de Programm mat mengem Trainer fäerdeg. Déi lescht Véierel Stonn maachen ech dann eleng nach e bësse Cardio Training.
Speakerin: Wat méchs du da genau, mat dengem Trainer.
Fränk: Ech maache ganz oft Kraafttraining. Dat heescht Muskulatioun, mat Gewiichter. Heiansdo trainéiere mir de Réck, heiansdo d'Been, heiansdo d'Äerm asw. 1-2 Mol de Mount, maache mir e Cardiotraining, wou mir lafen, sprangen oder boxen.
Speakerin: Dat ass bestëmmt flott, mee awer och ustrengend.
Fränk: Definitiv. Ech hu ganz dacks Muskelkater. Mee ech maachen et gär. Dat ass gutt fir meng Gesondheet.
Speakerin: Wat méchs du dann net gär um Training?
Fränk: Ech lafen net gär um Training. Ech ka jo och eleng de Weekend jogge goen. Um Training schaffen ech gär mat de Maschinnen. Dat kann ech net doheem maachen.
Speakerin: Merci, fir deng Zäit! Äddi an nach vill Gléck!
Fränk: Villmools Merci. Dat ass léif. Äddi.
- Luisteren Nogmaals beluisteren Doorgaan Wordt afgespeeld...
- Later beluisteren Later beluisteren
Laat meer zien

Afleveringen

Vun engem Date erzielen

Iwwer Vakanz schwätzen

Op e Konveniat goen

Wat hues du gëschter gemaach?

Gesondheet a Rotschléi

Dagesoflaf an Hobby: Salsa

Akafsgewunnechten

Gesondheet: Dokter an Apdikt

Transportmëttelen zu Lëtzebuerg

Aussprooch: De Buschtaf ,,r’’

De Stot maachen

Den Aarbechtsalldag

Hobbyen: Lafen a Schwammen

E Rendez-vous ausmaachen

E Rezept: Kniddelen

Fréijoer a Liblingsplaz zu Lëtzebuerg

Meng Famill

Iesspreferenzen an e Kommentar am Restaurant

Pläng a Projete fir d'Zukunft

Hobbyen: Sangen a Fitness